Bya Ssemakula John
Masaka – Buddu
Omwami wa Kabaka atwala essaza Buddu, Ppookino Jude Muleke atabukidde abagagga abeesulirayo ogwannagamba mu nsonga z’okudduukirira abeetaga okubeerwa n’abaliko obulemu .
Obubaka buno abutisse omumyuka we,, Muwalimu Kato Abudallah Kalule , mu musomo ogwategekeddwa okubangula abaami ba Ssaabasajja e Kalungu nga bukolera wamu n’ekitongole kya MADIPHA .
“Ekyamazima osanga abantu nga bateekamu ssente nti bagenda kulambula ku bisolo, kujooga e Nabugabo naye bw’otuuka n’olaba abantu abeetaavu oyinza obutaddamu kujooga. Akadde konna naawe osobola okufuna obulemu, bannange mwebale abaliko obulemu obuteesaasira.” Obubaka bwebutyo bwe busomye.
Muwalimu Kato Abudallah akukkulumidde abantu abayisa obubi abaliko obulemu kw’ossa n’okubasosola mu kifo ky’okubabudaabudda n’asaba babakwasizeeko kuba embeera gye balimu tebaagiyita.
Ye akulira ekitongole kya baliko obulemu mu Greater Masaka ekya MADIPHA, Musisi Richard ategeezezza bali mu kaweefube w’okulwanyisa endwadde naddala akafuba ne Mukenenya nga bwe bukulu bw’emisomo gino ate n’okukomya okusosola abantu abaliko obulemu .
Ate Omubaka wa Pulezidenti mu disitulikiti eno, Caleb Tukaikiriza yeebazizza Obwakabaka olw’ettoffaali lye batadde ku kutumbula ebyobulamu n’embeera z’abantu ekitwala eggwanga mu maaso.
Bo abaami ba Kabaka mu kitundu kino basiimye enteekateeka eno era abagamba nti bakweyambisa ebibasomeseddwa okukyusa embeera z’abantu.