Bya Ssemakula John
Kampala – Kyaddondo
Poliisi mu ggwanga ewadde amagezi abakulembeze okuli ow’ekisinde ki People’s Front for Transition, Dr Kizza Besigye, owa National Unity Platform (NUP), Robert Kyagulanyi Ssentamu awamu nabakulembeze abalala okukomya okukuma mu bantu omuliro.
Abakulu mu poliisi bagamba nti entegeka za bano tezigenda kukola kuba bannayuganda tebaagala muntu yenna ayagala kutabangula mirembe gyabwe kyokka ate nekirala okwekalakaasa kwebagala okutegeka kumenya mateeka.
Bw’abadde ayogerako ne bannamawulire omwogezi wa poliisi mu ggwanga, Fred Enanga agamba nti buli lukya bafuna amawulire nga bannabyabufuzi bano bwebatandise okukunga abantu basobole okwekalakaasa omwezi guno wabula nabasekerera nga agamba nti bannayuganda bantu ba ddembe.
“N’omulundi guno, entegeka zabwe tezigenda kukola kuba tebalina kyebagamba bantu wadde okubawa amagezi ku mbeera eriwo wabula bawoza kimu musigale ewaka. Bakozesa embeera y’ebyenfuna eri mu nsi yonna okuteeka okutya mu bantu awamu n’okubazanyisa eby’obufuzi,” Enanga bw’ alambuludde.
Poliisi esabye bannayuganda okwesonyiwa bano basigale mu mirembe era bwewabaawa abatiisatiisa bamuwaabire mu bakulu ab’obuyinza.
Enanga akakasizza nti nga poliisi beetegefu okwanganga embeera yonna era nalabula abo abatambuza n’okusaasaanya obubaka bwa bannamawulire bano nti bajja kuvunaanibwa.
Kinajjukirwa nti mu mwezi oguwedde abantu abawera 162 bakwatibwa mu kwekalakaasa kwa KUNGA okwaliwo wakati wa July 25-27, era ku bano 105 basimbibwa mu kkooti nebavunaanibwa nga kati bali ku alimanda.