Musasi waffe
Poliisi ya Uganda ng’eyitira mu mwogezi waayo Fred Enanga egambye nti siyakujja misanvu gyayo mu nguudo ezeetoolodde ekibuga Kampala okusobola okukwata abo abajeemera amateeka ku kuziyiza ekirwadde kya coronavirus.
Bwabadde ayogerako eri olukungaana lwabannamawulire ku kitebe ky’essengejjero lya mawulire ga gavumenti ekimanyiddwa nga Uganda Media Centre, Enanga agambye nti singa bajja emisanvu gino makubo, kijja kuba kizibu okukwata abavuzi b’emmotoka abatwala abantu abasukka mu basatu, abatakisi abatwala abantu abasukka mu musanvu oba aba boda boda abasaabaza abantu; ebikolwa byonna ebyawerwa gavumenti.
“Naye bweweetegereza emisanvu egisinga mukibuga twagijjawo okusobozesa emmotoka okutambula obulungi. Naye egyo gyetwalekawo bakama baffe baakisalawo gisigalewo okutusobozesa okukola emirimu gyaffe,” Enanga bweyagambye.
Ono yagasseeko nti ssabbiiti ewedde baakwata boda boda ezigenda mu 1000 wamu ne motoka ezigenda mu 300 okwetoololaa eggwanga wamu n’okusiba abantu era abakkunukkiriza mu 500 bonna lwakujeemera biragiro bya pulezidenti ku COVID-19.
“Tulabula abantu baffe nti tujja kubakwata singa munaagenda mu maaso n’okujeemera amateeka gano,” Enanga bweyagambye.