Bya Ssemakula John
Bulange – Mmengo
Minisita omuggya ow’obuwangwa, Ennono n’Obulambuzi, Oweek Anthony Wamala, akwasiddwa Woofiisi mu butongole.
Omukolo guno guyindidde mu Bulange e Mmengo ku Lwokubiri neyeebaza Beene olw’okumuwa obuvunaanyizibwa buno.
Woofiisi eno, emukwasiddwa Owek. Hajji Amisi Kakomo, abadde akuuma entebe ya Minisitule eno oluvannyuma lwa Owek David Kyewalabye Male okuwummula emirimu gy’Embuga.
Mu kwogera kwe, Owek. Anthony Wamala, agambye nti essira agenda kusooka kulisa ku kaddiyizo ly’ Obwakabaka okulaba nga litandika, wamu n’Okukakasa nti amasiro ge Kasubi gamalirizibwa olwo abalambuzi batandika okugettanira.
Owek. Wamala yeebazizza abo bonna abamusooka mu buweeereza buno olw’ettofaali lyebatadde ku kuzimba Obuganda era nawera okukola namaanyi ge gonna.
Kinajjukirwa nti Nnyinimu Ssaabasajja Kabaka Ronald Muwenda Mutebi II yakola enkyukakyuka mu gavumenti ye nabaako baminisita bawummuza ate n’okulonda abaggya nga Owek. Wamala y’omu kwabo abalondebwa.
Nga tanalondebwa ku bukulu buno, Owek. Anthony Wamala yabadde Ssenkulu w’ ettendekero lya Kabaka erya Buganda Royal Institute of Business and Technical Institute.