Bya Ssemakula John
Kampala
Omumyuka ow’okubiri owa Katikkiro era omuwanika w’Obwakabaka, Owek Robert Waggwa Nsibirwa afalaasidde abavubuka okwesigama ku bukozi basobole okukyuusa obulamu bwabwe era bakulaakulane.
Obubaka buno, Owek. Waggwa abuweeredde ku mukolo gw’okutongoza firimu y’Olugero lwa Nambi ne Kintu e Naalya mu Kampala ku Century Cinemax Metroplex ku Lwokubiri.
Owek. Nsibirwa agamba abavubuka balina okukola ennyo nga beeyambisa obuyiiya kibasobozese okuba nebiseera by’omu maaso ebitangaavu.
Omuwanika Nsibirwa yeebaziza abawandiisi nabateesiteesi ba firimu eno olw’obuyiiya bwebooloseza mu kukola firimu eno gyagambye nti bangi baakugiyigirako n’okwongera okumanya ebikwata ku Buganda.
Eyakuliddemu okuteekateeka Firimu eno, era omuwandiisi waayo, Peter Mukiibi annyonyodde nti kino bakikoze okwongera okunnyikiza ennono , obuvo nobuddo bwa Baganda mu mijiji emito nabo okubumanya awamu n’emirembe egirijja .
Ono asabye abawandiisi bakatemba , firimu n’emizannyo omulimu guno okugwesigamya ku buwangwa n’ennono byaffe nga kyakuyambako okubikuuma nokubinnyikiza mu bantu.
Owek. Waggwa bano abawadde obukadde 5 zibayambeko okutambuza omulimu ogw’ettendo gwebatandiseeko okulaba nga ekiruubirirwa kyabwe kigenda mu maaso .