Bya Ssemakula John
Bulange – Mmengo
Omumyuka ow’okubiri owa Katikiro Ow’ekitiibwa Wagwa Nsibirwa asabye bannamakolero awamu ne bannanyini bizineensi ku mitendera egy’enjawulo okwettanira emyoleso egy’enjawulo kibayambe okugaziya ku katale kabwe.
Minisita Waggwa Nsibirwa bino abyogeredde ku mukolo kwatongoleza omwoleso gwa Buganda ogugenda okubaawo omwezi ogujja mu lubiri e Mmengo nga 19-28 ogutuumiddwa, “Coronation Vintage Show” ng’omukolo gubadde mu Bulange e Mmengo ku Lwokusatu.
Owek. Nsibirwa agamba nti okwolesa kiyamba kinene nnyo okutumbula bizinensi y’omuntu ate n’oyo akwetabamu kimuyamba kwongera okuyiga ebipya awamu nokumanyisa abantu kwebyo byakola.
Ono asabye abatandisi b’amasomero wamu n’abakulembeze okuleeta abayizi mu mwoleso gw’Obwakabaka guno okusobola okumanya bizineensi ez’enjawulo zebasobola okutandika n’okumanya ebyaliwo mu nsi yabwe.
Ye Minisita w’ebyobulambuzi, obuwangwa n’ennono Owek. David Kyewalabye Male, akowodde abantu okweyiwa mu Lubiri lwa Beene okuva nga 19 – 28 okusobola okwenyumiriza mu mwoleso ogugenda okubaletera enjawulo mu bulamu bwabwe.
Ono era ategezezza bannabizinensi okwongera okwetanira okuyiga olulimi oluganda kuba lukozesebwa nnyo abantu nga terukoma ku baganda bokka naye n’abantu b’ebitundu ebirala.
Omwoleso guno gutegekeddwa ekitongole ky’Obwakabaka ki Buganda Heritage and Tourism Board wamu n’e Kampuni ya Luba Events era bonna baweze okugwongeramu ebinonogo .
Ssenkulu w’olukiiko olukulembera ekitongole ki Buganda Heritage Tourism Board (BHTB), Omuk. Benon Ntambi asabye abantu okujja mu bungi kuba enteekateeka y’omulundi guno ebadde tenalabwako wantu wonna.