Bya Shafik Miiro
Namilyango – Kyaggwe
Omumyuka Owokubiri owa Katikkiro, Owek. Robert Waggwa Nsibirwa akuutidde abafumbo okubeera ab’obuvunanyizibwa, kiyambe abalala okubayigirako.
Obubaka buno abuweeredde ku mukolo Omwami w’Essaza Kyaggwe Ssekiboobo, Owek. Vincent Matovu kwajaguliza emyaka 25 mu bufumbo ne mukyala we Dr. Lillian Nalumansi Matovu ku mukolo ogutegekeddwa ku ssomero lyabwe Our Lady of Africa e Namilyango.
Owek. Nsibirwa agamba Ssekiboobo Matovu n’ omukyala bakoze ebintu bingi ebisitudde abantu ab’enjawulo nga bayita mu bifo by’obukulembeze, okuzimba amasomero, amaka ne mu mbeera endala naasaba abalala okubayigirako.
Owek. Nsibirwa yebazizza ababiri bano olw’okwagalana, okukumaagana ate n’okukuza obulungi abaana abatali baabwe bokka wabula n’abeggwanga lyonna nga bayita mu masomero gaabwe.
Mu ngeri y’emu asiimye obuweereza bwa Owek. Matovu gw’agambye nti buli ky’akwatako mu bukulembeze bwe kitambula era y’ensonga lwaki Ssaabasajja azze amusuumuusa mu bifo eby’enjawulo okutuuka kati nga y’amulirako Essaza Kyaggwe lye yatuusizza ku luzannya olw’akamalirizo omulundi ogwasookedde ddala mu mpaka z’Omupiira gw’Amasaza.
Yebazizza n’omukyala Dr. Lillian Matovu olw’okubeera empagi ewanirira bba okukola ebintu eby’amaanyi ate n’okubeera omuwulize era omwetowaze. Ababiri abaagaliza okwongera okubeeragana mu ssanyu n’emirembe.
Bp. Christopher Kakooza omusumba w’e Lugazi y’akulembeddemu mmisa wano era ono yebazizza abafumbo bano olw’obuweereza bwabwe mu kkanisa ate n’olwokugunjula abaana b’Eggwanga. Bano abatuusizaako n’obubaka obubakulisa okuva ewa Ppaapa Francis. Abakubirizza okwongera okunywerera ku Katonda
Ababiri bano bazzeemu ne beesuubiza okwongera okukumaagana n’okwagalana ebbanga ly’obulamu bwabwe lyonna.
Omukolo gwetabiddwako Abaami ba Kabaka ku mitendera, Omumyuka w’Omukubiriza w’Olukiiko lwa Buganda Owek. Ahmed Lwasa, Baminisita, Abakiise mu Lukiiko lwa Buganda, Ssaabaganzi Emmanuel Ssekitooleko, Abaami b’Amasaza, Bannaddiini, Bannabyanjigiriza n’abantu abalala.