Bya Ssemakula John
Bulange – Mmengo
Omukubiriza w’Olukiiko lwa Buganda, Owek. Patrick Luwaga Mugumbule akubirizza abakugu okwezza obuggya beeyongere okwojiwala mu byebakola olwo kiyambe okutwala ebitongole byebavunaanyizibwako ku mutendera oguddako.
Bino abyogedde aggalawo omusomo gw’ abakulira amasomero, abasomesa, n’abayambako okutambuza emirimu gy’amasomero ku kwefumiitiriza ku nkyukakyuka n’ebisomooza mu masomero n’ensomesa empya, oguyindidde ku Muteesa I Royal University e Kakeeka Mengo ku Lwokusatu.
Owek. Mugumbule ategeezezza nti kikulu nnyo abasomesa okwefumiitiriza ku nsomesa empya nebamanya byebalina okukyuusa kibayambe okutambula n’enkyuukakyuuka okusobola okugasa abayizi kulw’ ebiseera eby’omu maaso.
Sipiika Luwaga abasomesa abakuutidde okukozesa obukugu bwebafunye okuzimba obulamu bw’abayizi bebasomesa ssi mu kibiina mwokka wabula ne mu mbeera eza bulijjo.
Minisita w’eby’enjigiriza n’Enkulaakulana y’Abantu, Owek Cotilda Nakate Kikomeko, asabye abasomesa okulowooza ku kyokuzimba omwana obwongo okusonga okumupakira ebintu ebingi mu mutwe olumu nebitamuyamba.
Owek. Nakate akakasizza nti eky’okuzimba omwana obwongo kye kisinga naddala mu mbeera zebatambulizaamu obulamu bwabwe obwa bulijjo.