Bya Ssemakula John
Lubiri – Mmengo
Katikkiro Charles Peter Mayiga ategeezezza nti okusaanawo kw’Obutondebwensi kyekimu ku bintu ebisobola okuvaako okwonooneka kw’ebyenfuna mu nsi nasaba abantu okubukwata obutiribiri.
Okusaba kuno Katikkiro Mayiga akukoledde mu Lubiri e Mmengo bw’abadde aggalawo wiiki y’Obutondebwensi mu Bwakabaka mu Lubiri e Mmengo ku Lwokutaano.
“Obutondebwensi bwebufa ebyenfuna bifa, emmere ebula, obuwangwa bufa, emiziro egimu egy’ebimera n’ebisolo gijja kuggwerawo ddala kuba gigenda kuba gibuliddwa wegibeera,” Owek. Mayiga bw’annyonnyodde.
Mayiga alaze nga okusaanawo kw’Obutondebwensi bwekijja kuvaako enjala, endwadde awamu n’okusaabulula obuwangwa ekintu eky’obulabe ennyo.
Ono ategeezezza nti waliwo akakwate wakati w’obutondebwensi n’emmere erimibwa mu ggwanga nategeeza nti wadde ebyenfuna bibi naye akalembeza akaliwo be bantu okuba nti bakyalina emmere kyokka singa obutondebwensi bwongera okutyoboola nayo ejja kubula.
Owek. Mayiga agamba nti ensi eri mu kattu olw’ebbeeyi y’ebintu eyeyongera buli lukya nga omukisa gwokka Uganda gwekyalina kwekuba nti ekyalina emmere. Bwatyo asabye bannayuganda okusitukiramu bataase Obutondebw’ensi.
Okusinziira ku Katikkiro Mayiga, Buganda y’entabiro ya Uganda n’enkulaakulana naye kino kijja n’okusomoozebwa eri Obutondebwensi kuba bwonoonebwa era y’ensonga lwaki entobazi ezisinze okwonooneka ziri mu Buganda.
Ate Minisita avunaanyizibwa ku butondebwensi mu Buganda, Owek. Mariam Mayanja Nkalubo, alaze Kamalabyonna ebikoleddwa mu Sabiiti eno omubadde emisomo, okusimba emiti awamu n’okulambula egyasimbibwa edda.
Owek. Mayanja ategeezezza nti amateeka agaliwo ensangi zino tegakosa nnyo bantu bonoona butonde nasaba gavumenti eyongere okumyumyulamu oba kisoboka ekkirize Buganda yekuumire ebibira n’entobazi ebiri mu kitundu kino.
Ye eyaliko omumyuka wa Pulezidenti w’eggwanga, Edward Kiwanuka Ssekandi yeebazizza Obwakabaka ku nteekateeka ez’enjawulo ezitasosola mu bantu naye nga ziruubirira okutumbula obulamu bwabwe n’okubakulaakulanya.
Sabiiti eno ebaddemu omwoleso gw’Obutondebwensi era etambulidde wansi w’omulamwa, ‘Obutondebwensi bwa mugaso eri ebitonde’ era Sabiiti eno ejjumbidde abantu mu biti eby’enjawulo.