Bya Francis Ndugwa
Kampala
Katikkiro wa Buganda, Owek. Charles Peter Mayiga asabye abantu okwegatta ku banna Rotary nga badduka mu misinde gimwetooloola byalo egituumiddwa ‘ Rotary Cancer Run’ okusobola okufufugaza ekirwadde kya kkookolo ekifuuse ensonga mu ggwanga.
Okusaba kuno Katikkiro Mayiga akukoledde mu Bulange – Mmengo ku Lwokubiri bw’abadde atongoza emisinde gya Rotary egya Cancer Run egy’omwaka 2021.
“Bw’oba oyagala Katonda olina kusooka kwagala bantu. Ate nze ndowooza engeri esinga okubeera entuufu, omu okulaga omulala nti amufaako kwe kumuyamba mu nsonga z’ebyobulamu. Buli omu alina bye yeegomba naye tolina ky’osobola kutuukako nga toli mulamu.” Katikkiro Mayiga bw’annyonnyodde.
Owek. Mayiga agasseeko nti amaka mangi mu ggwanga gatawaanyiziddwa ekirwadde kya kkookolo. Bw’atyo ne yeebaza banna Rotary olw’okuvaayo ne basalawo okuzimba waadi y’ekirwadde kya Kkookolo.
Mukuumaddamula yeebazizza Centenary Bank olw’okuvaayo ne bayambeko. Bw’atyo n’asaba abantu okuvaayo badduke basobole okutuukiriza ekiruubirirwa ky’emisinde gino eky’okukuuma abantu nga balamu nga mu ngeri eno ne Buganda ejja kusobola okudda ku ntikko.
Bwe tutabeera na bantu balamu, ebirooto byaffe tebijja kutuukirira. Muveeyo twegatte ku Rotary tusobole okulwanyisa ekirwadde kya Kkookolo nga twetaba mu misinde gya Rotary Cancer Run nga 29 , September 2020.” Katikkiro Mayiga bw’akunze.
Minisita w’ebyemizannyo n’abavubuka mu Buganda, Owek Henry Ssekabembe Kiberu ategeezezza nti omulamwa gwa Cancer Run mukulu nnyo kuba kugwatta ku byabulamu nga tebusosola mu ggwanga wadde eddiini era n’abasiima olw’ebyo ebituukiddwako okutaasa obulamu bw’abantu.
Owek. Ssekabembe akunze bannabyamizannyo okwettanira emisinde gino basobole okuyambako okutaasa obulamu.
Ssenkulu wa Centenary Bank, Omuk. Fabian Kasi ategeezezza nti emyaka 30 egiyise nga bakola emirimu nga bbanka, baasalawo okuteeka Buganda ne Uganda ku mwanjo era nga kino kirabira mu ppulogulaamu ez’Obwakabaka omuli Kyapa mu ngalo, Buganda Bumu awamu n’ebirala.
Omuk. Kasi annyonnyodde nti baakukola kyonna okukunga abantu mu Uganda n’ebweru waayo basobole okukwataganira awamu okulwanyisa ekirwadde kino nga bakolera wamu ne Banna Rotary era nga bawaddeyo ensimbi obukadde 50 okuyamba ku nteekateeka eno.