Bya Francis Ndugwa
Bulange – Mmengo
Omumyuka Asooka owa Katikkiro era Minisita avunanyizibwa ku nzirukanya y’Emirimu ne Tekinologiya mu Buganda Owek.Hajj Twaha kawaase Kigongo akubiriza abantu ba Ssaabasajja abawangalira mu masaza agali ebweru wa Buganda okufuba okunyweza ennono naye bafube n’okuyiga empisa z’ebitundu ebyo gyebawangaalira.
Obubaka buno Owek.Kawaase abubaweeredde ku Bulange e Mmengo bw’abadde atikkula Oluwalo okuva mu Masaza ga Ssaabasajja okuva wabweru wa Buganda , n’abasuubuzi abenjawulo ku Lwokubiri.
Owek. Kaawaase agamba nti singa abantu bano banyweza ennono n’obuwangwa bwabwe ate nebategeera empisa z’ebitundu gyebali kijja kuyamba okuleetawo obumu n’okukolaganira awamu ku nsonga ez’enjawulo.
Owek. Kigongo era bano abasabye okwenyigira mu nsonga zonna ezikolebwa mu bitundu ebyo kyagambye nti kyakubongerako kinene era bettanire n’enteekateeka za Buganda ez’enjawulo bongere okwekulaakulanya.
Prof. Twaha Kigongo Kaawaase, abeebazizza okudda ku butaka, ate naddala nga bazze n’abaana abato, kino kyongera okubayigiriza obuwangwa n’ennono zaabwe ng’Abaganda. Era abasabye beewale okwogera nabo mu luzungu wabula boogere Luganda kibayambe okumanya Ebika n’olulimi lwabwe.
Ye Minisita wa gavumenti ez’Ebitundu Owek. Joseph Kawuki asabye abantu ba Kabaka bonna gyebali okuba omumuli gw’Obwakabaka nga mukino Buganda lwejja okubukala wonna.
Ababaka b’Amasaza n’ Abasuubuzi abakiise embuga baweze okwongera okuweereza Beene awatali kumutiiririra okunnyikiza n’okunyweza ennono mu miti emito olwo Buganda edde ku ntikko.
Amasaza agakiise embuga kuliko; Busia/Malaba, Ankole ne Kigezi,Busoga, Mbale /Bukedi/Bugisu nga bano beegattiddwako Bannabusiro okuva mu Gombolola ya Mutuba 2 Kakiri, awamu n’Abasuubuzi nga bonna wamu baleese Oluwalo lwa bukadde 29 nemitwalo 22.