Bya Shafic Miiro
Kakeeka – Mmengo
Minisita wa Buganda ow’ ebyenjigiriza n’embeera z’ abantu, Owek. Cotilda Nakate Kikomeko yeebaziza nnyo Kabaka olw’okusiima n’aterawo abantu be omukisa guno okufuna obukugu mu by’emikono ku bwerere, basobole okukyuusa obulamu bwabwe.
Owek. Nakate asabye abatendekeddwa okukozesa amagezi gebafunye okwetandikirawo emirimu basobole okwekulaakulanya n’okukyuusa obulamu bwabwe. Ono Ayongeddeko nti buli omuntu alina obuvunaanyizibwa okuzimba eggwanga lino, bwatyo n’asaba abantu buli kyebakola bakikolere ddala na maanyi olwo Buganda ejja kwongera okusituka.
Minisita Kikomeko abatendekeddwa abasabye okuddingana okukola ebibayigiriziddwa baleme kubyerabira kibayambe okunyweza obukugu bwebafunye. Owek. Nakate abaakutidde n’okukubiriza abantu abalala okujjumbira emirimu egy’emikono era abasabye babazigirire Buganda Royal Institute basobole okufuna emirimu gy’ omutwe.
Ssenkulu wa Buganda Royal Institute, Owek. Joseph Balikuddembe Ssenkusu yeebaziza Kabaka n’olukiiko lwa bboodi ekulembera ettendekero olw’okussaawo enteekateeka n’okugiwagira, era ategeezeza nti abayizi abasoba mu 300 be bagiganyuddwamu. Yeebaziza abazadde olw’okuvujjirira abaana babwe n’okubaagazisa eby’emikono era asuubizza nti bajja kulondoola bonna abayigiriziddwa okulaba nga bassa mu nkola ebibatendekeddwa. Omuk. Balikuddembe agambye nti waliwo n’omukisa eri abasomye amasomo amampimpi ate okwongerako okusoma ku mutendera gwa satifikeeti oba dipulooma. Abayizi abatendekeddwa abasabye nti omusaala gwokka gwebasobola okuwa Kabaka, kwe kussa mu nkola ebibadomeseddwa.
Nnalulungi w’Ebyobulambuzi mu Ssaza Kyaddondo Ssanyu Ruth Mugabi, ku lw’abayizi banne abatendekeddwa eby’emikono mu kiseera kino, yeebazizza Kabaka olw’okubawa omukisa guno, ne yeebaza n’abasomesa baagambye nti babaweeredde ddala obukugu obubasobozesa okukola emirimu egy’enjawulo. Bwatyo n’asuubiza nti baakuteeka mu nkola byonna ebibasomeseddwa.
Abayizi bano baweereddwa empapula ezikakasa okubangulwa kwabwe, era bakoleddwa akabaga kwebooleserezza n’ebyo bye bayize.