Bya Musasi waffe
Obwakabaka bwa Buganda bufunye obugaali obuwerera ddala 12 obuyambako abaliko obulemu mu kutambula.
Omumyuka Owookubiri owa Katikkiro Owek. Robert Waggwa Nsibirwa yakwasiddwa obugaali buno okuva mu Banna-Rotary aba Kampala Ssese Islands nga bano baakolaganye ne Varsani Group ne bannamukago abalala okufuna obugaali buno.
Owek. Nsibirwa asinzidde wano n’asaba abo Katonda baasituddeko mu byenfuna okuyamba abali mu bwetaavu, nga babawa ebyo ebibayambako okutambuza obulamu bwabwe.
Owek. Waggwa yebazizza nnyo Banna-Rotary olw’enteekateeka eno era akakasizza nti obugaali buno bwakwongera okwanguyiza obulamu eri ababufunye bawone n’okunyomebwa mu bifo gye bawangaalira era kibayambe nabo okutuukiriza ebirooto byabwe.
Omumyuka w’Omukubiriza w’Olukiiko lwa Buganda Owek. Hajj Ahmed Lwasa naye asinzidde ku mukolo guno ne yebaza Bannalotale olw’okukolagana obulungi n’Obwakabaka era ategeezeza nti enkolagana eno evuddemu ebibala bingi ddala naddala mu byobulamu.
Gavana wa Rotary Omuky. Ann Nkutu akulembera disitulikiti 9213 asinzidde wano n’asaba Bannalotale okugenda mu maaso n’okukola emikago n’ebitongole ebiyambako mu kutuukiriza ebiruubirirwa bya Rotary era yebazizza nnyo aba Varsani Group olw’obuwagizi eri emirimu gya Rotary.
Banna-Rotary bakulembeddwamu ‘Governor’ Ann Nkuutu akulembera disitulikiti ya Rotary 9213 wamu ne Mw. Moses Ssebuggwawo Pulezidenti wa Rotary Kampala Ssese Islands ne bammemba abalala.
Abantu 5 be basoose okuweebwa obugaali kw’obwo 12 obuleeteddwa ate obulala ekitongole ky’abaliko obulemu ki Buganda Disability Council kigenda kubutuusa kw’abo abalina obwetaavu obusukkulumu ku bw’abalala.