Bya Ssemakula John
Kampala
Omuloodi wa Kampala, Erias Lukwago era amyuka ssentebe w’ekisinde kya People’s Front for Transition (PFT) kye batongozza, agamba nti kye kigenda okuggya Pulezidenti Museveni mu buyinza kuba kyanjawulo ku bisinde n’emikago ebizze bibeerawo.
Ekisinde kino kikulemberwa Dr. Kizza Besigye era nga kyaweereddwa omubala gwa ‘Red Card,’ kyatongozeddwa wiiki ewedde ku woofiisi za JEEMA e Mmengo era kyegattiddwako ebibiina by’ebyobufuzi ebiwerako mu ggwanga.
Abamu ku batunuulizi b’ebyobufuzi mu ggwanga bategeezezza nti guno mukago ng’emirala gyonna era tewali njawulo okuggyako okuwa bannayuganda essuubi eritaliiyo.
Lukwago bwe yabadde ayogerako eri bannamawulire, ategeezezza nti ekisinde kino kyolekedde obuwanguzi era kyanjawulo ku bisinde ebirala.
“Ebibaddewo gibadde mikago. Kati twogera ku kisinde ekigenda okuleetawo enkyukakyuka n’okuwa bannayuganda essuubi eritali lya kulonda kwokka nga tutandikira ku by’obufuzi ebiriwo ebitali bya bwenkanya n’oluvannyuma tutereeze eby’okulonda.” Lukwago bw’annyonnyodde.
Okusinziira ku Lukwago, eggwanga kati livugibwa na lyanyi lya mmundu era ekigendererwa ky’ekisinde kino kwe kulikomya, obuyinza busobole okukyuka kuba akalulu kalabika kalemeddwa.
Ku ky’ekibiina kya National Unity Platform (NUP) okubeera wabweru w’ekisinde kino, Lukwago agambye nti kino kya kaseera buseera naye basuubira mu maaso awo ebibiina byonna bigenda kubeegattako.
Ono ayanirizza okukugabanya ebirowoozo ku kisinde kino ng’erimu ku makubo ag’okukomya obukulembeze bwa Pulezidenti Museveni, wabula n’alabula abo abalowooza nti bayinza okugusuula nti, basale malala.