Bya Francis Ndugwa
Kasubi
Katikkiro wa Buganda, Charles Peter Mayiga atongozza omulimu gw’okusereka ennyumba Muzibwazaalampanga mu Masiro e Kasubi.
Katikkiro Mayiga, omukolo guno agukoze nkya ya leero ku Lwokuna era n’asiima ababadde emabega w’omulimu guno awamu n’Obuganda bwonna.
“Tukung’aanye wano olwaleero okukola omukolo ogw’ennono omukulu ogukulembera okusereka ennyumba eno Muzibwazaalampanga. Ssaabasajja Kabaka yatuwadde Omulangira Daudi Chwa era y’akulembeddemu emikolo era y’akwasizza Wabulaakayole, Sseddume w’ente ekitegeeza nti omusaayi gwonna ogwandiyiise mu nnyumba eno gujja kuggweera mu nte eyo. Oluvannyuma alinnye amadaala n’akwasa obuyole buna eri Wabulaakayole era omulimu ne gutandika.” Katikkiro Mayiga bw’ategeezezza.
Okusinziira ku Katikkiro Mayiga, oluvannyuma lw’Omulangira okuwaayo obuyole, omulimu gutandikiddewo era n’Omutaka Kasujja Kyesimba nga ye w’akasolya mu b’Engeye mu mutuba gwa Wabulaakayole naye n’agenda ku Muzibwazaalampanga n’akwasa Muzukkulu we obuyole bubiri.
Owek. Mayiga agambye nti naye yazze n’ekita ky’omwenge era yalidde entabaluganda okutabaganya ensonga zonna eziri wano era ne yeegobola n’okwegobola, bw’atyo n’akakasa nti emikolo gyonna emikulu gikoleddwa.
Ono asiimye Minisita Kyewalabye Male avunaanyizibwa ku buwangwa, Owek. Kaddu Kiberu, Katikkiro w’amasiro, Abasiige, Abagalagala n’Abazaana, olw’okwewaayo okukola omulimu guno. Asabye abantu obuteeraliikirira kuba basemberedde okumaliriza omulimu gw’okusereka Muzibwazaalampanga.
Minisita avunaanyizibwa ku mulimu guno, Owek. Kyewalabye Male agambye nti mu bbanga si ddene omulimu gw’okusereka gugenda kweyoleka ensi era abantu bajja kuba balaba essubi nga liteekebwa ku nnyumba ya Muzibwazaalampanga. Guno gujja kuba gugenda mu maaso nga n’Abagiriinya bawunda ebizizi n’okuteekateeka munda.
Ate ye Mackay Nakabaale Wabulaakayole annyonnyodde nti omulimu gukoleddwa wakati mu bwegendereza n’okugoberera ennono era n’agumya Obuganda nti buli kimu kitambula Bulungi.
Ssentebe w’akakiiko k’okuzzaawo Amasiro, Owek. Kaddu Kiberu asabye Abaganda okumanya nti okusereka kuzze kutambula mu mitendera era omulimu guno gututte akaseera era n’agamba nti waliwo obwetaavu bw’essubi eringi nnyo. Ku nsonga eno asabye abalina essubi okulireeta kuba olugendo lwe baliko lumpi nnyo okusinziira gye bavudde.
Kinajjukirwa nti Amasiro g’e Kasubi gaakwata omuliro nga March 16, 2010, era Obwakabaka bwatandikirawo enteekateeka z’okugazzaawo. Era Kamalabyonna Charles Peter Mayiga abadde agumya abantu lunye okumanya nti Amasiro galiko obulombolombo n’ennono, ebirina okugoberera nga kino kye kimu ku nsonga lwaki gatutte ekiseera kinene okuzzibwawo.