Bya Ssemakula John
Kampala
Ssentebe w’Akakiiko k’ebyokulonda omulamuzi Simon Byabakama, awakanyizza ebyogerwa ab’oludda oluvuganya nga akalulu k’ Omoro bwekabadde Vvulugu n’okugulirira abalonzi nti bino si bituufu kuba ye yennyini yaliyo naye bweba balina obujulizi balumbe kkooti.
Kino kiddiridde ebibiina ku ludda oluvuganya okuwakanya obuwanguzi bwa munnakibiina ki National Resistance Movement (NRM), Andrew Ojok eyawangula akalulu kano nadda mu kifo kya kitaawe eyali Sipiika Jacob Oulanyah.
Omulamuzi Byabakama agamba nti yaliyo mu kalulu kano era amateeka agakwatagana n’akalulu gagobererwa bulungi.
“Ekizibu kyetulina mu bigambo by’okugulirira abalonzi, ababyogera ate si beetegefu kuvaayo bawaabe ebikolwa bino eri ab’obuyinza wadde bakimanyi nti musango oguvunaanibwa mu mateeka g’ebyokulonda. Naye etteeka terisobola kuluma nga teriyambiddwako kuteekebwa mu nkola ate okuliteeka mu nkola walina okubaawo aloopa ku poliisi,” Byabakama bwe yagambye.
Byabakama yannyonnyodde nti amateeka malambulukufu ku nsonga y’okugulirira abalonzi nasaba abalina obujulizi okugenda mu kkooti esazeemu akalulu kano.
Ono yakkiriza nga akulira oludda oluvuganya mu Palamenti, Owek. Mathias Mpuuga bweyamukubira essimu namutegeeza nga bwewaliwo abantu ba NUP abaali bakwatiddwa era namusaba akwatagane ne Kamisona wa poliisi eyali adduumira eby’okwerinda.
Okusinziira ku Byabakama, Kamisona wa poliisi yamutegeeza nti balina munnakibiina ki NUP gwebali bakutte oluvannyuma lw’okumwekengera nga ayinza okutabangula akalulu kano era byebyo byeyasobola okumutegeeza.
Byabakama agamba nti mu kalulu kano abantu balina eddembe okutambula wonna kuba tewaliwo muntu yenna gwebaali bakugira kutambula.