Bya Betty Namawanda
Kyotera – Buddu
Omubaka omulonde ow’essaza ly’e Kyotera mu Palamenti, Lukwago John Paul Mpalanyi, yasimbiddwa mu kkooti esookerwako e Kaliisizo n’avunaanibwa emisango Ssennyiga Corona.
Okusinziira ku mulamuzi w’eddaala erisooka mu kkooti eno, Mufitundinda George, omubaka ono yakuba enkung’aana e Nakatoogo mu ggombolola ye Nabigasa olwali lumenya amateeka. Kinajjukirwa nti olukung’aana luno lwafiiramu omuwagizi wa Mpalanyi Richard Kayabula, poliisi eyali edduumirwa DPC w’e Kyotera, Judith Akello, bwe yali egezaako okugumbulula olukung’aana.
Omuwaabi wa gavumenti, Tukwasibwe Alex, yalumirizza Omubaka Mpalanyi okulemerako n’akuba olukung’aana luno nga Decemba 4 wadde nga yali akimanyi bulungi nti lumenya mateeka.
Ono era agasseeko nga Mpalanyi bwe yakuba olukung’aana olulala mu Ttawuni kkanso y’e Kyotera mu October 16 ekyali kimenya ebiragiro bya gavumenti.
Mpalanyi emisango gyonna egimusomeddwa agyegaanye n’agamba nti bino byonna bikolebwa Minisita Haruna Kasolo bwe baali bavuganya.
Ono yannyonnyodde kkooti nti olukung’aana lwa Decemba 4 lwaliko abantu batono era baali bagoberedde ebiragiro bya Ssennyiga Corona.
Ye munnamateeka wa Mpalanyi , Alexander Lule owa Xander & Co. Advocates agamba nti emisango egiteekeddwa ku muntu waabwe mijweteke era mu bwangu kkooti ejja kumwejjeereza.
Mu ngeri y’emu Ssentebe wa disitulikiti y’e Kyotera, Patrick Kintu Kisekulo, yalumirizza Minisita Kasolo okuwa ebiragiro ebyavaako omuwagizi waabwe okufa nga yeekwese mu Ssennyiga Corona wadde baali bagoberedde amateeka.
Oluvannyuma omulamuzi Mufitundinda George akirizza Omubaka Mpalanyi okweyimirirwa ku bukadde 4 ezitali zaabuliwo ku misango 2 egimuvunaanibwa wamu n’abamweyimiridde bana (4) ku bukadde 4 buli muntu akakadde kamu akatali kaabuliwo.
Era omusango guno gwakuddamu okuwulirwa nga 13 omwezi ogujja.