Bya Gerald Mulindwa ne Francis Ndugwa
Bulange – Mmengo
Obwakabaka bwa Buganda nga buyita mu kibiina ky’Olulimi Oluganda busse omukago naba DFCU Bank okuwagira omwoleso gw’eby’enjigiriza oguliyo mu Gatonnya ne Mukutulansanja omwaka guno.
Omwoleso guno gwa kubeera mu Lubiri okuva 26-28 omwezi guno, ne 2-4 omwezi ogujja.
Akolanga Ssentebe w’Ekibiina ky’Olulimi Oluganda, Muky. Nansubuga Grace Lubowa, asinzidde wano naalaga obukulu bw’omwoleso guno nga bwegutunuulidde okuyamba enjuuyi zombi, abazadde, omuyizi, n’amasomero mu kaweefube w’okutumbula eby’enjigiriza.
Ye akulira ekitongole ky’ebyenjigiriza mu DFCU Bank, Brian Katamba, ategeezezza nti obuwagizi bwabwe mu nteekateeka eno babwesigamizza ku mulamwa gw’okukyuusa obulamu bw’abantu n’ebyenfuna byabwe.
Katamba agamba nti baagala abazadde bajje balabe amasomero ag’ebisale ebisaamusaamu, naago agali ku mutindo omulungi mu by’enjigiriza gyebanaatwala abaana baabwe. Akoowodde amasomero gajje geenyigiremu abazadde nabayizi beeroboze mu byebaagala.
Bwabadde atongoza omukago guno, Minisita w’Obuwangwa Ennono n’Obulambuzi, Oweek Anthony Wamala eebazizza ab’ekibiina ky’Olulimi Oluganda olw’enteekateeka eno egendereddwamu okukwanaganya omuzadde, omuyizi ne bannanyini masomero.
Asabye Ekibiina ky’Olulimi Oluganda nga baagala enteekateeka ebeera ya mugundu, bafune olukalala lw’amasomero gebatandikirako nga basoose ku gekenneenya kyongere omuzinzi mu nteekateeka y’omwoleso guno.
Owek. Wamala asanyukidde omukago ne DFCU era naabasaba nga basinziira ku bukugu bwebalina, bayambeko mu kwongera obuyiiya mu kukola enteekateeka y’omwoleso oguggumidde nga bali wamu n’Obwakabaka.