Bya Ssemakula John
Kampala
Munnakibiina ki NRM era mutabani wa Jacob Oulanyah, Andrew Ojok Oulanyah, nga yeesimbyewo okuvuganya ku kifo ky’omubaka wa Omoro mu Palamenti ategeezezza nti yali asuubira Pulezidenti wa NUP, Robert Kyagulanyi Ssentamu okumuwagira mu kalulu kano.
Ojok agamba nti Kyagulanyi alina kuba nga awagira abavubuka abato okutwala obuyinza naye yeewunya bweyalaba alonzeewo omuntu atuuse okubeera Jjajja we okuvuganya ku kifo kya Omoro.
Ojok, bino yabyogeredde mu nteekateeka y’okukubaganya ebirowoozo nga abeesimbyewo ku Mmande buli omu mweyalagidde byategese okukolera abantu ba Omoro.
“ Nasuubira Bobi Wine okuwagira abavubuka nga nze mu kalulu kano naye yasalawo kulondawo Jjajjange, neemanyi era ne Katonda akimanyi nti nsobola, kuno kuyitibwa naye abantu bwebandaba eyo ebeera ndowooza yabwe, ” Ojok bwe yagambye.
Ojok annyonnyodde nti wadde Simon Toolit eyaliko mu kibiina ki FDC nga kati ali mu NUP, akoledde abantu ba Omoro ebintu bingi naye akkirize nti kano kaseera ka bavubuka bato era akkirize be baba batwala obuvunaanyizibwa mu maaso.
Wabula omu ku bavuganya ku kifo kino Jimmy Onen agamba nti ekifo ky’omubaka wa Omoro tekirina kuba kya nsikirano wabula Ojok, yategeezezza nti tazaalibwa Oulanyah kyokka naye alina obusobozi bwonna okulembera ekitundu kino era nasaba banne okumwegattako.
Bino webijjidde nga Pulezidenti Yoweri Museveni asuubirwa okutalaaga ekitundu kino leero ku Lwokubiri nga anoonyeza Ojok obuwagizi.
Abalala abali mu lwokaano luno mulimu; Kizza Oscar (ANT), Odong Justine (FDC), Odonga Terence (IND), Onen Jimmy Walter (IND) ne Tolit Simon Akecha (NUP).
Era okusinziira ku kakiiko k’ebyokulonda, okulonda mu Omoro kugenda kubaawo ku Lwokuna nga May 26, 2022.