Bya Samuel Stuart Jjingo
Mmengo – Kyaddondo
Minisita w’Obuwangwa n’Ennono Oweek Dr. Anthony Wamala asisinkanye Bannaalinnya abakuuma Amasiro ga Bassekabaka ba Buganda okwongera okuttanya ku nsonga ez’enjawulo era olukiiko luno luyindidde ku kitebe ky’ekitongole ky’ebyobulambuzi mu Buganda e Mengo.
Minisita Wamala abasabye okufaayo ku nsonga 4 okuli; obukulembeze obunywedde obulungi nga busobola okwenganga ebizibu ebiri mu bitundu bye bakulembera, okukunga abazukkulu abava mu mu ba Ssekabaka b’embuga ezo ze bakuuma okudda awaka benyigire mu nteekateeka y’enkulakulaana ku butaka bwabwe, okukola enkiiko z’abayima (trustees) okwetaasa kibbattaka wamu n’okusala entotto ku bintu ebisobola okukolebwa ku ttaka basobole okufunamu ensimbi ezikulakulaanya obutaka.
Minisita Wamala abategezeeza ku lutabalo lw’aliko mu kulambula ebika byonna mu Buganda n’abategeeza nti asanze okusoomozebwa kw’abazzukulu bangi abesuuliddeyo ogwannagamba obutamanya bika byabwe bwatyo n’abasaba Bannaalinnya okukunga abazzukulu okujjumbira emirimu egikolebwa.
Oweek. Wamala asinzidde wano n’ategeeza nti Obwakabaka bwatandiika enteekateeka y’okuteeka abayima ku ttaka ly’amasiro gonna kikendeeze ku bantu abeefunyiridde okutunda ettaka eryo.
Ssentebe w’Olukiiko lwa ba Nnaalinnya, Nnaalinya Beatrice Namikka yebazizza Minisita w’Obuwangwa n’Ennono Oweek. Dr. Anthony Wamala okutegeka olukiiko luno lw’agambye nti lugenda kubayamba okuvvuunuka ebibanyigiriza n’obumolumulu bwonna obuliwo ku mbiri zonna.