Bya Ssemakula John
Bulange – Mmengo
Minisita w’Obuwangwa, Ennono, Embiri, Amasiro n’Ebyokwerinda mu Bwakabaka, Owek. Anthony Wamala akubirizza Nnalulungi wa Buganda n’Abamasaza okukulembeza empisa mu buli kyebakola era bannyikire okusoma bwebaba baagala okubeera ab’omugaso mu ggwanga.
Okwogera bino, Minisita Wamala abadde mu nsisinkano ne Bannalulungi b’ebyobulambuzi mu Buganda ababadde bakulembeddwa Vannesa Hannah Nabakungulu mu Bulange e Mmengo ku Lwokusatu.
Owek. Anthony Wamala bano era abasabye okubeera abayiiya mu byebakola bwatyo asuubizza nti obwakabaka bwakukolera wamu nabo okutumbula eby’obulambuzi mu Buganda.
Ono agambye nti ssinga bannalulungi bano bakozesa omukisa gwebalina nebatumbula eby’obulambuzi mu Masaza gyebasibuka, kya kutumbula eby’obulambuzi mu bitundu bya Buganda eby’enkizo, nokwongera ensimbi mu ggwanika ly’Obwakabaka.
Ye eyakulembeddemu bannalulungi bano Vanessa Hannah Nabakungulu ayanjulidde Minisita enteekateeka zeebalina okutumbula eby’obulambuzi mu Buganda ku mitendera egy’enjawulo.
Abamu ku bannalulungi abeetabye mu nsisinkano eno nga bakulembeddwaamu Nabakungulu Vanessa Hanna okuva e Buddu, Sanyu Ruth Mugabi owe Kyaddondo, Jemimmah Bright ne Nansukusa Esther, beeyamye okukolagana n’Obwakabaka mu kutumbula eby’obulambuzi mu Buganda ne Uganda yonna.