Bya Shafic Miiro
Bulange – Mmengo
Minisita w’Obuwangwa, Embiri, Amasiro, Obulambuzi n’Ebyokwerinda Oweek. Dr. Anthony Wamala akuutidde bannayuganda okutumbula obuwangwa kibayambe okwongera okugunjuka n’ okulaakulana.
Okwogera bino, Minisita abadde asisinkanye aba African Monologue Challenge, abavuddeyo okutumbula Obuwangwa bwa Africa nga bayita mu kwolesa enzikiriza n’obuwangwa bw’Abafirika ku Lwokubiri e Bulange Mmengo.
Owek. Wamala ategeezezza nti Buganda erina obukulembeze obw’Ennono obumu ku businze okuwangaala mu Nsi yonna era Obwakabaka bulina ebyensinkirano byabwo bingi ddala ebyetoololerwako obulamu bw’abantu ba Buganda okwekulaakulanya, okulambula, n’okumanya ebyafaayo.
Ono anokoddeyo ebifo nga Amasiro, Embiri, Ennyanja ya Kabaka n’ebirala nga bino bisimbye mu buwangwa bwa Buganda ate nga bigasa n’abantu.
Ye Minisita w’Amawulire n’Okukunga era Omwogezi w’Obwakabaka, Oweek. Israel Kazibwe Kitooke abayitiddemu ku bimu ku byafaayo by’Obwakabaka, era n’abasaba okuwaayo obudde okwongera okunonyereza ku Buganda kubanga erina ebyafaayo eby’amaanyi, ebinyuma ate nga birimu eby’okuyiga bingi ddala.
Eyakulembeddemu abagenyi Rev. George Okeng, kulwa banne yeebazizza omukisa gwe bafunye okukyalako ku mbuga y’Obwakabaka Bulange e Mengo era bateegezeza nti bingi bye basomye ne bye bawulidde ku Buganda ebibasikiriza okwongera okuvumbula ebyafaayo byaayo n’ebigikwatako eby’enjawulo.
Bano era bagamba nti baategeka okuvuganya kwabwe okwasooka omwaka oguwedde mu kibuga Accra mu Ghana era munnayunganda Racheal Nduhukire ye yawangula, ekyawa Uganda omukisa okutegeka ez’omwaka guno.
Abakiis embuga okuva mu Nsi za Africa ez’enjawulo nga Uganda, South Africa, Kenya, Nigeria, Ghana n’endala.