Bya Ssemakula John
Bwaise – Kyaddondo
Omumyuka Ow’okubiri owa Katikkiro era Omuwanika wa Buganda, Owek. Robert Waggwa Nsibirwa asabye amaka ku mitendera egy’enjawulo okulambika abaana mu makubo amalungi agasobola okubakulaakulanya kiyambe okukendeeza ku bbula ly’emirimu eriri mu ggwanga.
Owek. Nsibirwa agamba nti singa abaana baviira ddala mu buto nga balambikiddwa ku mikutu n’emirimu omuva ensimbi ebbula ly’emirimu lisobola bulungi okufuuka olufumo.
Bino Owek. Waggwa abyogeredde mu kuggalawo omusomo gw’ebyemikono oguyindide ku ssomero lya Emmanuel college e Bwaise ku Lwokutaano.
“Uganda erina ekizibu ky ‘ebbula ly’ emirimu naye ekizibu ekisinga obunene bwe bukulembeze ku mitendera egy’enjawulo. Wano waliwo abantu abalina ebizibu nga singa obibakolerako basobola okusasula ssente okugeza singa osobola okukanika essimu netereera,” Owek. Nsibirwa bw’annyonnyodde.
Ono ategeezezza nti emirimu gy’ebyemikono esinga obungi gyetaagibwa mu bitundu ebyenjawulo buli kaseera bwatyo neyeebaza abakulira essomero lino olwekyo ekikoleddwa.
Omukulu w’essomero lino, Paul Kiguba, annyonyodde nti enteekateeka eno yakubangawo buli luwummula okulaba nga embeera z’abantu zikyuka basobole okweggya mu bwavu era nasaba abaganyuddwa okussa mu nkola bye bayigiriziddwa .
Enteekateeka eno egendereddwamu okukyuusa embeera z’abantu be Bwaise n’okukendeeza ku kusomoozebwa kwebasanga olw’ebbula ly’emirimu n’obwavu nga babawa obukugu okwetandikirawo emirimu gy’ebyemikono.
Bano babanguddwa mu bintu nga okufumba cake , okukanika , okusiba enviiri n’okukukuba bulooka.