Bya Ssemakula John
Bulange – Mmengo
Minisita avunaanyizibwa ku nsonga z’ Abavubuka, Ebyemizannyo n’Okwewummuzaamu, Owek. Henry Ssekabembe Kiberu atongozza empaka z’omupiira gw’Amasaza ez’omwaka 2023.
Omukolo guno, Owek. Ssekabembe agukoledde mu Bulange e Mmengo ku Lwokubiri nakakasa nti empaka zino zakuggulawo ku Lwomukaaga nga 24/ June /2023 nga Busiro ekyaaza Mawokota mu kisaawe e Wankulukuku.
Owek. Ssekabembe agamba nti emiryango gyakuggulwawo ku ssaawa 4 ez’okumakya ate omupiira gutandike ku ssaawa 9 ez’olweggulo wansi w’omulamwa gw’okulwanyisa mukenenya ng’ Abaami bebakutte omumuli.
Okusinziira ku Ssekabembe, tikeeti ez’olukale zaakugula omutwalo gumu ogwa silingi (10,000) ate abakungu bayingirire emitwalo 3 (30,000). Ono agasseeko nti neku mulundi guno abavujirizi kuliko Airtel, Centenary Bank, UNAIDS, Majestic Brands, BBS ne CBS.
Ono asabye amasaza gonna okweteekateeka obulungi gasobole okwolesa omutindo oguli ku ddaala erya waggulu mu mipiira gyonna 104 egigenda okuzannyibwa kiyambe okwongera okutumbula obuganzi bw’empaka zino.
Owek. Ssekabembe agamba nti ku mulundi guno, empaka zino bagenda kuzitambuliza ku bintu bisatu okuli abantu, omutindo gw’ekikopo kino awamu n’okufuba okulaba nti bagaggyamu akasente wadde kino si kyekikulembedde.
Minisita Ssekabembe agumizza abantu ku ky’omupiira guno okubeera nti gugenda kusambirwa Wankulukuku mu Kyaddondo nakakasa nti wadde kiri bwekiti naye Busiro esigadde yekyaaza Mawokota era ejja kufuna ebyo byonna ebiweebwa ttiimu ebeera ekyaaza.
Ssentebe w’ olukiiko olutegesi lw’empaka zino, Sulaiman Ssejjengo asabye abantu okuvaayo mu bungi bawagire amasaza gabwe era bagayambeko mu by’ensimbi okusobola okufuna omutindo omulungi.
Kinajjukirwa nti Busiro yerina ekikopo ky’omwaka oguwedde oluvannyuma lw’okuwangula Buddu era ttiimu ezigenda okuttunka ziri mu bibinja bisatu okuli; Bulange, Masengere ne Muganzirwazza ng’ekikopo kino kigenda kuba kizannyibwa omulundi gwa 19 bukya kitandika.