Bya Ssemakula John
Wandegeya – Kyaddondo
Minisita avunanyizibwa ku by’obulimi ne Bulungibwansi mu Buganda, Owek Hajjati Mayanja Nkalubo akubirizza bannayuganda okwenyigira mukugaba Omusaayi era kino bakikola mu nkola eya Bulungibwansi.
Okwogera bino, Minisita Nkalubo abadde ku muzikiti e Wandegeya mu Kyaddondo mu nteekateeka y’okugaba omusaayi ku Lwokutaano.
“Omulimu gw’okugaba omusaayi gwa Bulungibwansi era olwa leero ekyongedde okunywera mu bwongo bwaffe kwekutambulira awamu nokufaayo ku munno. Obubenje bwokka si bwebwetaaga omusaayi naye endwadde zonna kasita zinyinyitira mu mubiri zimalamu omusaayi,” Owek. Mayanja bw’ ategeezezza.
Ono asabye abantu bulijjo okukwatira awamu ku nsonga eno kuba mu nsi yonna teriiyo kkolero lya musaayi kyokka nga buli lukya waliwo agwetaaga.
Minisita Nkalubo agamba nti singa abantu banavaayo okugaba omusaayi mu bungi ekizibu ky’okugutunda nakyo kisobola okukendeera.
Amyuka Supreme Mufti wa Uganda Sheikh Ibrahim Itanda nga yabadde omugabi omukulu yeebazizza Ssaabasajja Kabaka Ronald Muwenda Mutebi olw’okusitula embeera y’ebyobulamu mu ggwanga.
Ono agambye nti ekikolwa eky’okugaba Omusaayi kya bwa Katonda kubanga nemu biwandiiko ebitukuvu kyawandikibwako.
Omukolo guno gwetabiddwako abakulembeze abenjawulo era Olunaku olwenkya abavuuzi ba takisi mu ppaaka zonna eziri mu Kampala bebajja okugaba Omusaayi.