Musasi Waffe
Minisita W’obuwangwa n’Ennono Owek. David Kyewalabye Male atenderezza abakulembeze mu Ggombolola ya Mutuba I Bukuya mu Ssingo olw’obutetenkanya n’okwagala olulimi lwabwe bwe baatandikawo enkola y’ekyoto kwebasomeseza n’okuvuganya mu lulimi oluganda. Kyewalabye okusiima kuno yakukoledde ku kitebe ky’eggombolola e Bukuya bwe yabadde akiikiridde Katikkiro mu mpaka ezaakamalirizo ezaatuumiddwa Emmanduso y’obwongo. Yagambye nti empaka nga zino zikola kikulu okukuuma n’okuggumizza olulimi mu bantu ba Bugabda era n’asuubiza nti ng’ayita mu minisitule ye, bagenda kukwatagana n’abategesi b’empaka zino zisaasaanyizibwe mu bitundu bya Buganda byonna. Yeebazizza abo abaavuddeyo okuvuganya era n’akubiriza abantu okufaayo okumanya ebikwata ku Buwangwa bwabwe wamu n’ensonga ezaabulijjo.Omukwanaganya w’empaka zino Kazibwe Emmanuel yategeezezza nti abantu abasoba mu 170 be beetabye mu kuvuganya okutuusa bwebaasunsulamu 15 abatuuse ku mpaka z’akamalirizo ezaawanguddwa Kasozi Lameka n’akwasibwa Ente.Omukolo gwetabiddwako, bannabyabufuzi, abayizi n’abakulembeze okuva mu ssaza, okwabadde Mukwenda eyawummudde Abubaker Magala wamu ne Mukwenda omuggya David Nantajja.