Bya Ssemakula John
Mukuuma – Bulemeezi
Minisita w’Olukiiko, Kabineeti n’Ensonga ez’enkizo mu Woofisi ya Katikkiro, Owek. Noah Kiyimba alabudde abazadde abatiitiibya ennyo abaana nga balowooza nti babalaga mukwano nategeeza nti bano kyebayita omukwano kubawabya.
Owek. Kiyimba bino abyogeredde Bulemeezi ku ssomero lya St Mary’s of Egypt Monde mu Ggombolola ya Mutuba IV Mukuma gy’abadde omugenyi omukulu wakati ng’ abayizi bavuganya mu bitone ebyenjawulo.
Minisita Kiyimba asabye abazadde okugunjula obulungi abaana baleme kubatiitiibya bwebaba bakugasa eggwanga Uganda n’ensi Buganda mu biseera by’omu maaso.
Kiyimba era afalaasidde abazadde okufaayo okuweerera abaana basobole okubeera nebiseera byomumaaso ebitangaavu.
Ye Ssaabasumba w’ ekkanisa yaba Orthodox, Metropolitan Jeronymous Muzeeyi asinzidde wano nalaga okutya olw’abantu abongera okuva ku njigiriza ya katonda nga kyekiviriddeko ebikolwa ebyekko okweyongera.
Omwami wa Kabaka atwala essaza Bulemeezi, Kangaawo Omulangira Ronald Mulondo asabye gavumenti okukwasizaako ku batandiisi b’amasomero ag’obwanannyini ku byetaagisa kiyambeko okutumbula ebyenjigiriza mu ggwanga.
Ye omutandisi w’essomero lino, Sister Maria Mubiru ategeezeza nti ng’oggyeko ebyenjigiriza, ebitone bikulu mu kukyusa obulamu bw’omuntu nga yeesonga lwaki balwana okubivumbula mu bayizi saako nokubitumbula basobole okubifunamu nga bakuze.