Bya Ssemakula John
Nnantameggwa w’empaka z’ekikopo ky’ Amasaza eky’omwaka 2021 erya Buddu, liyiseewo okugenda ku luzannya lwa ‘Quarter Finals’, abalala kuliko Buweekula, Gomba Mawokota, Ssingo, Busiro awamu ne Kyaggwe.
Ttiimu zino eziwera omunaana zayiseewo oluvannyuma lw’okumala ennaku 10 namba nga zizannya mu bibinja n’ebisaawe eby’enjawulo.
Ekibinja Bulange
Mu kibinja kya Bulange; Buweekula yekikulembedde n’obubonero 22 oluvannyuma lw’okuwangula Butambala ggoolo 2-1.
Butambala ye yasoose okuteeba ggoolo yaayo ng’eyita mu Hassan Mubiru era wano omutendesi wa Buwekula Frank Mulindwa, yaleese Shaifik Kakande okukyuusa omuzannyo.
Sharafah Mukiibi yasobodde okuteeba ggoolo 2 Buwekula newangula.
Ate ku kisaawe kya Kabulasoke PTC Core, aba Gomba bawangudde Kabula ggoolo 2-0 nebafuna obubonero 21 olwo nebayitawo nga bakutte kyakubiri emabega wa Buweekula.
Sam Lukoye yeyateebedde Gomba Lions etendekebwa Emuron Recoba.
Mu kikopo kino Kooki yawanguddwa Mawokota ggoolo 2-0. Zino zaateebeddwa Abubaker Mayanja ne Stuart Kezaala.
Ekibinja Muganzirwazza
Muno mwavuddemu Busiro, Bulemeezi ne Kyaggwe okusobola okugenda ku luzannya oluddako.
Busiro yasoose kuwangula Bulemeezi ggoolo 1-0 mu mupiira ogwayindidde ku kisaawe e Ssentema. Ate yo Bugerere yawanguddwa Kyaggwe 1-0 mu mupiira ogwayindidde e Luweero nga Anthony Male yeyateebedde Kyaggwe.
Wabula omupiira wakati wa Busujju ne Ssese tegwazanyiddwa oluvannyuma lwa Busujju obutalabikako.
Ekibinja Masengere
Mu kibinja kino , Mawogola eyabadde ewaka yakubiddwa ggoolo 0-3 bannantameggwa b’ekikopo kino aba Buddu. Abateebedde Buddu kuliko Bruno Bunyaga, Ibrahim Kirya me Reagan Kirumira.
Kyaddondo yalemeddwa okugenda ku mutendera oguddako oluvannyuma lw’okukubwa Ssingo ggoolo 2-1. Abateebedde Ssingo kuliko Amuli Mukasa ne Godfrey Ssemanda.
E Nakasongola , Buluuli ne Buvuma bagudde maliri ggoolo 1-1.
Obululu bw’ omutendera oguddako ogwa ‘Quarter Finals’ bugenda kukwatibwa nga September 7, 2022 e Bulange Mmengo.