Bya Ssemakula John
Buvuma
Kamalabyonna Charles Peter Mayiga amalirizza okutongoza enteekateeka y’Emmwanyi Terimba mu bizinga by’e Buvuma ey’omwaka 2022 gy’abaddeko okumala ennaku 3 nnamba era alese abazadde baayo abasoomoozezza okufaayo okugunjula abaana awamu n’okubaweerera.
Katikkiro Mayiga asookedde mu kulambula essomero ly’omusirikale wa Kabaka, Vincent Katende erya St. Mary’s Day and Boarding Secondary School erisangibwa mu ggombolola y’e Kirongo eyadda ewaabwe okwongera okutumbula ebyenjigiriza n’enkulaakulana.
Kamalabyonna Katende amusiimye okubeera ekyokulabirako era omukozi bwatyo n’asoomooza abazadde mu kitundu kino okubasomesa era babagunjulire mu mpisa okutumbula obuntubulamu. Eno Kamalabyonna agguddewo ekizimbe okuli woofiisi Katende kye yabbuddemu erinnya lya Teddy.
Nannyini ssomero lino, Vincent Katende aloopedde Kamalabyonna abazadde abatayagala kusomesa baana mu kitundu kino nga beekwasa obwavu.
Owek. Mayiga era asisinkanye abaami abakulembererako Ssaabasajja essaza lino, abaami b’amaggombolola, abeemiruka n’abatongole mu kitundu era bano abasabye buli omu okulima olubimbi lwe okusobola okwewewula ku mirimu.
Bano abasabye buzzeemu abantu amaanyi nga batandikira ku bo bennyini kyongere okugumya abantu ba Beene ku ebyo ebibasoomooza.
Abaami bano nga bakulembeddwamu Mbuubi, Ssaalongo Eugene Kayiza baloopedde Katikkiro ensonga ezikwata Ku ttaka e Buvuma nga bagamba nti waliwo abasuza abantu ba Kabaka ku tebuukye nga baagala okubabbako ettaka lyabwe.