Bya Ssemakula John
Mabanda -Butambala
Katikkiro wa Buganda, Charles Peter Mayiga asabye abantu naddala abajja mu bibuga okuddangako ewaabwe naddala gye bazaalwa bakulaakulanyeeyo mu ngeri ez’enjawulo, kiyambe okusitula ebitundu gye bava.
“Nkubiriza mmwe abali mu bibuga naddala abeesobola mugendeko mu byalo muteekeyo ensuku, ennimiro z’emmwanyi n’amayumba amalungi.” Katikkiro Mayiga bw’agambye.
Kamalabyonna yabyogeredde mu kukubagiza Mansul Matovu abangi gwe baakazaaako erya Yanga eyafiirwa maama we, Annah Namaganda gye buvuddeko ku myaka 97 n’aziikibwa mu disitulikiti y’e Butambala.
Owek. Mayiga asinzidde wano n’asaba abaana bulijjo okulabirira abazadde baabwe era n’asiima abaana olw’obujjanjabi bwe bawa nnyaabwe. Era asiimye Yanga olw’okuwaayo ensimbi mu nteekateeka ya Twekobe ejjudde.
Ate Omugagga Yanga yeebazizza Katikkiro Mayiga olw’okukola ennyo n’okubaagazisa okuweereza Obwakabaka mu mbeera zonna.
Owek. Mayiga mu lugendo luno awerekeddwako baminisita; Owek. Mariam Mayanja Nkalubo ow’ebyobulimi, obulunzi n’obwegassi, Owek. Noah Kiyimba minisita wa Kabineeti, Amawulire era omwogezi w’Obwakabaka bwa Buganda ng’abaaniriziddwa Katambala Hajji Sulaiman Magala.
Omukolo gwetabiddwako Omusika wa BMK, n’abakulu abaddukanya wooteeri ya Africana e Moroto.