Bya Francis Ndugwa
Bulange – Mmengo
Kamalabyonna Charles Peter Mayiga asabye abavubuka baleme kwetuulako naye bavumbule ebitone byebalina babikozese okukyuusa obulamu bwabwe kuba ebyemizannyo gwafuuka mulimu.
Obubaka buno Katikkiro Mayiga abuweeredde mu Bulange e Mmengo ku Lwokutaano bw’abadde asisinkanye omuzannyi w’ensamba ggere Jantuyo Juma oluvannyuma lw’okuwangula omusipi gwa World All Fights System Organization gyebuvuddeko.
“Abantu bangi balina ebitone naye tetumanyi. Abavubuka baleme kwetuulako naye bafube okuvumbula ebitone ebibalimu,” Owek. Mayiga bw’ategeezezza
Owek. Mayiga era agamba nti emirimu gikola kinene okuwummuza obwongo eri ababeera bamulaba ate nga abeera afunye omulimu ogumuwa ensimbi ate ne gavumenti neesobola okufunamu omusolo nekola ku byetaago bya bannansi.
Ye Minisita w’Abavubuka Emizannyo n’Ebitone, Owek. Ssaalongo Sserwanga Robert, ategeezezza nti obuwanguzi bw’omusipi guno busibuka mu kiragiro Beene kyeyawa nga asaba abavubuka okubaako kyebakola mu bunyikivu n’obumalirivu.
Owek. Sserwanga wano waasabidde abavubuka ba Buganda baleme kwetuulako bafube okutumbula ebitone ebibalimu batuuke ku buwanguzi baganyule abeewabwe wamu n’Eggwanga.
Juma Jantuyo yeebaziza bonna abamukwatiddeko okutuuka ku buwanguzi buno era n’asuubiza okwongera amaanyi mu muzannyo guno.
Kinajjukirwa nti Jantuyo azannyira mu Poweflex Kickboxing academy era yakuba Ivan Koreta okuva mu Pentagon Kickboxing Academy nga 31st December omwaka oguwedde ku Bugiri Medical grounds.
Mu nsisinkano eno ewa Kamalabyonna, Jantuyo abadde n’abatendesi be okubadde Omulangira Walugembe Latif ne Mujaasi Farouk.