Musasi Waffe
Katikkiro Charles Peter Mayiga asiimye Leediyo ya CBS ku lw’okuduukirira abali mubizibu. Ng’ayogerera mu Bulange e Mmengo mukwanjulirwa ssente ezaava mu kyeggulo kya Kalisoliiso, Mayiga yagambye ekimu ku kiremesezza amawanga ga Afirika okukula, kwekutya okukola ebinene. “Ebimu kubitulemesa okukula kwekutya okwetantala ekintu ekinene. Abantu bagala kukola buntu butono n’amawanga ga Africa bwegatyo. Okutya kutulemesa okukola ebintu ebitegeerekeka,” Katikkiro bweyategeezezza. Obukadde 162 bwebwakunganyiziddwa nga buno bugenda kukozesebwa mukuzimba ekifo awatuukirwa abagudde ku bubenje muddwaliro lya Nkozi. “Obumalirivu mbubeebaza olw’okusalawo okukola ebintu bino. Omukulembeze omulimu gwe, kwekutema empenda okuvuunuka ebizibu bino. Obuyiiya bwetaagisa mumbeera zino mwetuli sikukkuluma buli kiseera n’okunyumya ebizibu buli lukedde,” Mayiga bweyagambye.