Bya Pauline Nannyonjo
Mmengo – Kyaddondo
Katikkiro Charles Peter Mayiga akoowodde gavumenti ya Uganda okutegeka akalulu ka 2026 ak’emirembe.
Bino abyogeredde ku Bulange e Mmengo mu nsisinkano gy’abaddemu ne banakibiina ki National Unity Platform.
Effujjo erikolebwa poliisi n’amagye mu kiseera ky’okuwenja akalulu naddala ak’obwapulezidenti lisinze kulabika nga likolebwa ku bannakibiina ki National Unity Platform mu bitundu ebyenjawulo ng’abawagizi bwabwe bakugirwa okugoberera abantu baabwe era emirundi mingi balabiddwako nga bakubwa emiggo, omukka ogubalagala w’amu n’amasasi. Embeera eno y’evvuddeko eddoboozi lya Katikkiro ku nsonga eno.
“Kankowoole gavumenti okulaba nga tubeera n’akalulu ak’emirembe; emiggo, omukka ogubalagala, amassasi ebyo tubirekere abalabe abagenda okuzinda Uganda, abo abalabe tubakube nnyo nnyo naye abatuuze tuleme kubakuba bintu ebyo ate tubeera nabo kuba gw’okubye emiggo oyagala alagewa? Nsaba abakwasisa amateeka bakikole mu bwesimbu awatali kyekubiira era ffena tugoberere amateeka’ Katikkiro Mayiga.
Katikkiro Mayiga mu mbeera y’emu abawagizi ba National Unity Platform naddala abavubuka abasabye okwewaayo okuyiga okusingira ddala ku bantu abakulu ababasinga, baleme kumala googera buli kye basanze, abajjukiza olugero; ’emmeeme etafumba bigambo ekwogeza munno kyatalyerabira” bw’atyo abakubirizza okusengejja bye boogera ku mitimbagano bireme kubalondoola mu myaka gya bukulu ate batuuke okwejjusa.
Mu nsisinkano eno akulira ekibiina kya National Unity Platform Robert Kyagulanyi Ssentamu yebazizza Kamalabyonna olwa bulijjo okuyimiriranga n’abo abanyigirizibwa ng’avumirira obumenyi bw’amateeka obubakolebwako mu naddala mu kampeyini zaabwe
“Twagala okwebaza Oweekitiibwa Katikkiro, tukulaba nga ossa eddoboozi lyo mu kuvvumirira okutulugunya, n’obumenyi bw’amateeka obukolebwa mu ggwanga tumanyi nti okikola newankubadde embeera y’abannakyemalira weeri naye webale kubanga mugumu n’okutuzzaamu amaanyi kuba buli lwe tuwulira eddoboozi eriva embuga nga liyimirira wamu n’abantu ba Kabaka n’abantu ba Buganda ne Uganda kituzaamu amaanyi ssebo webale nnyo” Kyagulanyi.
Kyagulanyi asinzidde wano n’avumirira ekiwamba bantu ekikyagenda mu maaso mu ggwanga newankubadde abantu ab’enjawulo bakyogeddeko enfunda eziwera. Ono alaze obwennyamivu nti embeera eno n’okutwaliramu Bannaddiini era anokoddeyo eky’okulabirako Kya Rev. Fr. Deusdedit Ssekabira ow’e Masaka eyabuzibwawo poliisi n’emwegaana ate oluvannyuma amaggye ne gakkiriza nti ge gamulina. Agamba nti ebikolwa bino bisaana okukoma Bannansi beeyagalire mu Nsi yaabwe.
Joel Ssenyonyi, Omwogezi wa NUP naye tayawukanye ku mukama we wadde, yekokkodde ebikolwa bya poliisi n’amagye eby’okukuba abantu baabwe ne babakugira n’okutuuka mu bifo eby’enjawulo gye baba baategese enkungaana zaabwe.
Newankubadde ebikolwa nga bino eby’okukuba abantu emiggo, omukka ogubalagala n’amasasi bivumirirwa entakera, abakuumaddembe bakyalabibwa nga baddamu bye bimu naddala eyo Kyagulanyi gy’aba anonyeza akalulu mu nnaku ez’enjawulo.