Bya Ssemakula John
Bulange – Mmengo
Kamalabyonna Charles Peter Mayiga akunze abantu ba Kabaka okumunywererako mu mbeera zonna kibayambe okunyweza obumu era bakulaakulanye Obuganda.
Okwogera bino, Owek. Mayiga abadde aggalawo enteekateeka y’Oluwalo ey’omwaka guno mu bimuli bya Bulange ku Lwokubiri.
Katikkiro Mayiga akubirizza abantu okwewala okutwalibwa ebimala gayiting’ana wabula bafeeyo okulondoola amawulire amatuufu naddala ku gafa e Mmengo era beeyambise emikutu emitongole egy’Obwakabaka.
Mukuumaddamula era asabye abakulembeze mu gavumenti eyaawakati okujjumbira emirimu gy’Obwakabaka.
Ate Minisita omubeezi owa Gavumenti ez’Ebitundu, Owek. Joseph Kawuki yeebazizza abaami ba Kabaka ku mitendera gyonna olw’okwagazisa abantu ba Kabaka enteekateeka eno ekyongedde okuyitimusa Obwakabaka.
Oluwalo lwa leero lukung’aanyizza obukadde obusobye mu 100 era abaami b’eggombolola n’abaamasaza bano, beebazizza Ssaabasajja Kabaka olw’enteekateeka eno.
Enteekateeka eno ezingiddemu amasaza okuli; Ssingo, Gomba, Kyaddondo n’amasaza g’Omutanda ag’ebweru okuli; Scandinavia, South Africa ne Canada.
Ku mukolo guno, bassenkulu b’ebitongole by’Obwakabaka ebyenjawulo nga Ssuubiryo Zambogo SACCO, Yinsuwa y’Obwakabaka eya Weerinde n’ebirala, basinzidde wano ne bakunga abantu okubeegattako.