Bya Francis Ndugwa
Njeru – Kyaggwe
Ssaaabasajja Kabaka Ronald Muwenda Mutebi II asiimye n’aggulawo empaka z’emipiira gy’amasaza ez’omwaka 2021 eziyindidde mu kisaawe kya FUFA Technical Centre e Njeru mu Kyaggwe.
Omutanda ayaniriziddwa omumyuka asooka owa Katikkiro, Owek. Twaha Kigongo Kaawaase, Minisita w’ebyemizannyo n’okwewummuza, Owek. Henry Kiberu Ssekabembe awamu n’abakulira olukiiko olutegesi olw’empaka zino.
Omupiira ogugguddewo gubadde wakati wa ttiimu y’essaza lya Gomba nga lizannya ne Kyaddondo era gye biggweeredde nga Kyaddondo ewangudde ku ggoolo 2-0 nga zombi ziteebeddwa Omusambi Ssenyunja Isaac mu kitundu ky’omuzannyo ekisoose.
Kino kitegeeza nti Kyaddondo y’ekulembedde ekibinja kya Masengere n’obubonero busatu era oluzannya luno lugenda kuddirirwa emipiira mu bibinja ebyenjawulo; Butikkiro, Muganzirwazza ne Bulange era gigenda kusambibwa mu ngeri ya ssaayansi olw’ekirwadde ya Ssennyiga Corona.
Gomba ye Nnantameggwa w’ekikopo kino nga yakuba Busiro ggoolo 3-1 okusitukira mu kikopo.