Bya Ssemakula John
Ekibiina ki ‘Forum for Democratic Change (FDC)’ kirangiridde nga bwekireese Justine Odong okukikwatira bbendera ku kalulu k’omubaka wa Omoro mu Palamenti nga adda mu kifo kya Denis Owani agambibwa okuba nti yawambiddwa.
“ Tulangiridde Odongo mu butongole nga eyeesimbye ku kkaadi y’ekibiina kyaffe mu kalulu k’omubaka wa Omoro,” Ekibiina bwe kirangiridde ku Lwokutaano.
Odong ye ssentebe w’ekibiina ki FDC mu disitulikiti ye Omoro, ono yaliko ssentebe wa LC3 owa ggombolola ya Tochi wakati wa 2016 -2021.
Okwanjulwa kwa Odongo kiddiridde amawulire okutegeeza nga Owani eyabadde alina kkaadi ya FDC bweyabadde awambiddwa era akaseera k’okwewandiisa wekatuukidde nga tamanyise gyaali.
Okusooka akulira okunoonyeza FDC obuwagizi, Philip Ojara yabadde akakasizza abantu b’ekitundu kino nga bwebagenda okuwandisa Owani mu mbeera zonna era balina essuubi nti abadde ajja kuwangula akalulu kano.
Oluvannyuma lwa kaweefube w’ekibiina okuwandiisa Owani okugwa obutaka basazeewo okusimbawo Odong adde mu kifo ky’ Owani.
Odong kati yalimu essuubi lya FDC okuwangulwa Omoro mu kalulu akalimu okuvuganya okwamanyi okuva mu bibiina ebivuganya awamu nekya NRM.
Kinajjukirwa nti ekifo kino kyafuuka kikalu oluvannyuma kw’eyali Sipiika Jacob Oulanyah eyafa mu mwezi gwa March omwaka guno nga akalulu kasuubirwa okubaawo nga 26 omwezi guno..