Bya Ronald Sserwadda
Kampala
Ebyentambula bisannyaladde mu bitundu bya Kampala n’emiriraano, oluvannyuma lwa poliisi okusalako enguudo ezimu okuwa omwagaanya abagenda okwewandiisa okuvuganya ku kifo ky’obukulembeze bw’eggwanga.
Oluguudo lwa Jinja Road, Ben Kiwanuka Street, Kyaggwe Rd, ebitundu bya Makerere, Mengo, Bweyogerere ne Nothern Bypass, entambula nzibu.
Ate yo e Kamwokya oluguudo Oludda ku woofiisi z’ekibiina kya National Unity Platform ziteereddwako emisanvu era abo bokka abennyonnyolako ennyo be bakkirizibwa okuyitawo.
Ensonga eggazza oluguudo luno tennaba kulambululwa poliisi wabula olunaku lweggulo yalabudde nti yagudde mu kakodyo kakwatidde ekibiina kino bbendera, Robert Kyagulanyi Ssentamu, okukunga abantu bamuwerekereko okwewandiisa nga 3 November ate nga kimenya amateeka agateereddwawo.
Yo e Kireka, Bbanda ne Nakawa, abaayo bali ku muggalo kiro na misana, okusobozesa akakiiko k’ebyokulonda okuwandiisa abaagala okuvuganya nga tewali kutaataagana kwonna.
Yoweri Kaguta Museveni owa NRM, Mugisha Muntu owa ANT, Henry Tumulunde atalina kibiina n’abalala, be bamu ku basuubirwa okwewandiisa olwaleero.