Bya Ssemakula John
Kampala
Eyali Ssenkulu wa w’ekitongole kya Kampala City Authority (KCCA) ow’ekiseera, Eng. Andrew Kitaka, alekulidde emirimu gy’abaddeko mu kitongole kino oluvannyuma lw’okukiweereza okumala ebbanga lya myaka mwenda mulamba.
Kitaka okulondebwa nga Ssenkulu ow’ekiseera yaggyibwa ku bwadayirekita bw’ekitongole ky’abayinginiya. Eng. Kitaka okulondebwa kyaddiirira eyali Ssenkulu w’ekitongole kino, Jennifer Musisi okusuulawo ttawulo n’agenda ku ku ttendekero lya Harvard University gye yali afunye omulimu.
Ono yali ssenkulu ow’ekiseera okutuuka mu June 2020, Pulezidenti Museveni lwe yalonda Doroth Kisaka okubeera ssenkulu, abamu kye bagamba nti kaalabika ng’akabonero akaggya obwesige mu Kitaka eyali akoze okumala akaseera, ng’alinda okukakasibwa.
Oluvannyuma lw’okuleeta Kisaka, Kitaka yazzibwayo ku bwadayireekita mu kitongole kya bayinginiya ba KCCA, obukulu bw’abaddeko okutuuka olwa leero.
Bwe yali awaayo woofiisi, Kitaka yategeeza nti abakozi ebitundu 40 ku 100 mu KCCA kkontulakiti zaabwe bwe ziri za kaseera kampi ate nga basatu ku badayireekita nabo ebifo byabwe bakola nga bakiseera nga tebakakasibwanga, nga kino kibamalamu nnyo amaanyi.