Bya Miiro Shafik
Lubiri, Mengo – Kyaddondo
Mu 1996, Ssaabasajja Kabaka yasiima n’atandikawo leediyo y’Obwakabaka CBS mu mwezi gwa Ssebaaseka nga 22. Omwaka guno giweze emyaka 29 ng’omukutu guno guleebya emirala gyonna mu Uganda era bano bajaguza ekkula ery’emyaka 26 mu Lubiri e Mengo wakati mu mwoleso gwa CBS PEWOSA.
“Emyaka 29 ku muntu giba mitono, naye ku kkampuni emyaka 29, ebeera ekakase ate bwetwogera ku CBS okukukkata, tukyogerera mu kkowe ery’entegeka z’ezze ekola okukyusa embeera z’abantu” Owek. Mayiga.
Katikkiro Charles Peter Mayiga atenderezza omulimu amakula ogukoleddwa leediyo CBS okukulaakulanaya abantu ba Kabaka nga eyita mu nteekeeka zaayo ezenjawulo nga CBS PEWOSA, Entanda ya Buganda, Pulogulaamu nga Kaliisoliiso, Akeezimbira n’ebirala. emyaka 29 gyemaze nga eweereza abantu bakabaka nasaba okwongera okubetanira.
Katikkiro agamba nti CBS esoosowaza nnyo embeera z’abantu ng’entumbula ebyenfuna byabwe, enkulaakulana, obuwangwa, ebitone omuli n’okugoba ennyimba z’abazaire ezaali ziyambye Uganda, olwo yo CBS n’esitula ennyimba z’abayimbi aba wano. Bwatyo yeebaziza bonna abawagira CBS mu ngeri ez’enjawulo okulaba nti etuukiriza ebigendererwa ebyagitandisaawo.
Kamalabyonna asanyukidde enkyukakyuka ezireeteddwa ku leediyo CBS nga zino okusinga zitunuulidde bavubuka okulaba nti bongera okwetannira leediyo y’Obwakabaka, ate nayo okwongera ku bungi bw’abawuliriza baayo, anti ensangi zino abavubuka be basinga obungi mu Uganda.
“Ndi musanyufu olw’enteekateeka ezitunuulidde omuvubuka, abavubuka mu Buganda bwe tubaleka emabega tetujja kudda ku ntikko, awonno mbasaba mwongere amaanyi mu kulera abavubuka mu nsonga z’obuwangwa, kubanga ku ebyobuwangwa bwe obulamu. Abavubuka CBS erina okubayigiriza ebintu bino naye mu ngeri etukaana n’embeera mwe bali gye banaategeera nga tekinologiya” Katikkiro Mayiga.
Minisita w’Ebyamawulire mu Buganda era avunanyizibwako leediyo eno yebazizza bboodi n’abakulira entambuza y’emirimu mu leediyo eno olw’enkyukakyuka ezireeteddwa zaagambye nti zijja kuyamba nnyo leediyo okusigala ku mutindo n’okuvuganya mu Nsi etwaliddwa tekinologiya mu buli kimu. Asabye amaanyi gongerwe mu kuteeka obunyomero obusikiriza abavubuka okuwuliriza leediyo, n’okuteekawo pulogulaamu ezituuka mu bantu obutereevu.
“Minisitule egenda kwongera okuwagira emirimu gya leediyo ne bboodi okulaba nti etuukiriza obuvunaanyizibwa bwayo nga ne kati omuntu bw’agenda ku kibanja kya Buganda eky’omutimbagano asobola okuwuliriza CBS wonna waali” Minisita Kazibwe.
Ssentebe wa bboodi ya CBS, Omuk. David Balaaka, yeyanzizza Kabaka olw’okutandikawo CBS ate n’abawa n’omukisa okugiweererezaamu, agamba nti emyaka 29 nsonga nkulu kyokka ekisinga okuba eky’omuwendo by’ebyo ebituukiddwako mu bbanga eryo naddala eky’okusitula embeera z’abantu. Asuubiza nti baakwongera okuyiiya n’okukola enteekateeka ezikuumira Leediyo eno ku ntikko.
Ssenkulu wa CBS, Omuk. Michael Kawooya Mwebe wamu n’akulira ebiweerezebwa ku mpewo ku leediyo eno Abby Mukiibi banjudde enkyukakyuka empya ezizze mu CBS nga muno mulimu abaweereza abakyusiddwa okuva mu Pulogulaamu ezimu okudda mu ndala, abaweereza abaggya abaleeteddwa okwegatta ku CBS, n’essawa z’amawulire ezimu naddala ku mukutu gwa 89.2 okukyukamu.
Dr. Kwefulukuta ne Lady Titie abadde bakola emisana mu kalasa mayanzi baziddwq ku makya mu Mukeeze Express, are olwo webabadde wateereddwawo abaweereza bapya ddala, amawulire ga 89.2 ag’essaawa esatu ez’okumakya kati gaakubangawo ku ssaawa bbiri ez’okumakya olwo ag’esatu gasigale ku mmanduso yokka. Enkyukakyuka zino n’endala zitandika ku bbalaza nga 23 Ssebaaseka.
Bano bannyonnyodde nti enkyukakyuka zonna zitunuulidde okwongera okusikiriza abavubuka okwettanira leediyo, n’okwawula emikutu gyombi ogwa 88.8 ne 89.2 abawuliriza basobole okukakkata, ate n’abalanga ne leediyo basobole okweyongera.
Ku mukolo guno wabaddewo n’okusiima abamu ku baweereza abaludde ne leediyo eno, abasiimiddwa kuliko; Michael Kawooya Mwebe, Robert Kasozi, Abbey Mukiibi n’abalala, ate n’abamu ku bawuliriza aboolulango aba CBS nabo basiimiddwa, n’abamu ku bantu abakoze eby’enjawulo mu mwoleso gwa CBS PEWOSA.
Omukolo gwetabiddwako Omutaka Namwama Augustine Kizito Mutumba, abakiise ku bboodi ya CBS, abaweereza ku leediyo, aba CBS Fans Club, Banna-PEWOSA, n’bantu ba Kabaka abalala bangi ddala.