Bya Musasi Waffe
Obwakabaka bwa Buganda bututte abalimi 80 e Kenya bongere okuyiga ebyobulimi ebiri ku mutindo ogwa waggulu. Bano bakulembeddwamu Minisita w’Obulimi, Obwegassi, Obusubuuzi n’Obuvubi Oweek. Hajj Amisi Kakomo.
Minista Kakomo abakuutidde okufaayo ku bigenda okubasomesebwa olwo bakomewo babiteeke mu nkola era abajjukiza omulanga gwa Ssaabasajja ku byobulimi okusitula embeera z’abantu be.“Ekimu ku bigendererwa ebibatutte mu ggwanga lya Kenya kwe kussa mu nkola ekiragiro kya Kabaka eky’okutumbula ebyobulimu n’okusitula embeera z’abantu be,” Owek. Kakomo.
Omumyuka wa ssentebe wa bboodi ya Kabaka Foundation era Omulabirizi wa West Buganda Diocese eyawummula Rt. Rev Bishop Henry Katumba Tamale yeebazizza Obwakabaka olw’okufaayo eri abantu mu byobulimi ky’agamba nti batandise okuganyulwa mu nteekateeka nga eya mmwanyi terimba.
Ye Ssenkulu wa Kabaka Foundation Omuk. Eddie Kaggwa Ndagala agamba nti ky’ekiseera abantu ba Ssaabasajja Kabaka okukomya embeera y’okusabiriza kubanga balina obusobozi okwetusaako buli kimu kyebetaaga kasita bamalirira.
Omubaka wa Busiro East Hon. Medard Lubega Ssegona naye eyeegasse ku balimi bano, agamba nti gavumenti erina obuvunanyizibwa bwa maanyi ddala okutumbula ebyobulimi n’okunoonya obutale okusobozesa abantu okuganyulwa obulungi mu bulimi bwe bamanyi obulungi ate nga n’ebyenfuna by’eggwanga kwe byesigamye.
Abalimi bano basookedde mu malundiro g’ebisolo ag’enjawulo mu ssaza lya Githunguri e Nairobi, kuno kuliko amulundiro ag’ente, embuzi, Enkoko, embizzi n’ebisolo ebirala.
Eno emu ku nteekateeka y’okutumbuula ebyobulimi n’obulunzi mu Buganda, egwa mu mukago gw’ekitongole ki Kabaka Foundation n’ekitongole kya Heifer International Uganda ekivujjirirwa Mott Foundation esangibwa mu ggwanga lya America.