Bya Ssemakula John
Bulange – Mmengo
Obwakabaka bwa Buganda butongozza olukiiko lw’abantu 13 olugenda okuddukanya empaka z’Amaato mu ku mutendera gw’Amasaza okumala emyaka esatu.
Olukiiko olutongozeddwa lukulemberwa Eng. Ben Misagga, amyukibwa Faridah Nakazibwe ,Maurice Mukiibi w’Amawulire ,Omuwandiisi Akullo Olive ,Ronny Mutebi Nsubuga ye muwanika ate munnamateeka ye Derrick Kavuma n’abalala.
Omukolo gw’okutongoza akakiiko gubadde ku mbuga enkulu e Bulange Mengo ku Lwokubiri.
Minisita w’abavubuka, emizannyo n’okwewummuza mu Bwakabaka, Owek Henry Ssekabembe Kiberu asabye abakulembeze okunyweza entambuza y’emizannyo egy’enjawulo nga bateekamu obudde, kiyambe emizannyo okweyimirizaawo.
Owek. Ssekabembe akuutidde olukiiko okumanyisa abantu ba Ssaabasajja Kabaka n’okubaagazisa omuzannyo gw’Amaato basobole okugwettanira, okutumbula ebitone n’okwekulakulanya.
Ssentebe w’olukiiko olulondeddwa Eng. Ben Misagga asuubizza nti ng’olukiiko beetegese okufuula omuzannyo gw’Amaato ogw’ettutumu.