Bya Ssemakula John
Kasanje – Busiro
Obwakabaka butandise kaweefube w’okusomesa n’okwagazisa emiti emito obukulu bw’okukuuma obutonde bwensi okusobozesa emigigi eginajja okuzzaawo obutonde bwensi obusaanyizibwawo buli lukya.
Enteekateeka eno etongozeddwa minisita avunaanyizibwa ku ttaka, Obulimi n’Obutondebwensi mu Buganda, Owek. Mariam Mayanja Nkalubo bw’abadde akuliddemu okusimba emiti okwetoloola Buganda ng’omukolo guno gubadde mu ggombolola ya Ssaabawaali Kasanje mu Busiro gyebasimbye ekibira.
Bino byebimu ku bikujjuko ebikulembeddemu okukuza olunaku lw’ Obutondebwensi olwateekebwawo Ssaabasajja Kabaka okwongera okwefumintiriza ku bukulu bw’okukuuma n’okuzzaawo obutondebwensi mu ggwanga.
Minisita Mayanja asabye abazadde okulaba nga abaana benyigira mu nteekateeka eno era babasikirize okusimba emiti era bagirabirire kuba y’engeri yokka gyebagenda okusobola okufuna omutima ogukuuma obutonde .
Omwami wa Kabaka amulamulirako eggombolola ya Ssaabawaali kasanje, Andrew Benon Kibuuka, ategeezeza nti bakufuba okukuuma ekibira kya Beene ekisimbiddwa olwaleero ate nokwongera okunyikiza enjiri ey’okukuuma n’okuzzaawo obutonde mu bantu.
Olunaku lwenkya Ssabiiti y’Obutondebwensi mu Buganda lwekomekerezebwa n’omukolo omukulu mu Lubiri e Mengo wansi w’omulamwa ogugamba nti ” obutondebwensi bwamugaso eri ebitonde”