Bya Musasi Waffe
Kampala
Akulira ekisinde kya Peoples Front for Transition (PFT) awandiikidde Pulezidenti w’ekibiina kya National Unity Platform (NUP) n’akulira ekibiina kya Alliance for National Transformation (ANT) ng’abasaba bamwegatteko bateeke akazito ku gavumenti eyongera okulabya bannansi ennaku buli lukya.
“Twetaaga okukolera awamu okusobola okuggyamu ekiramu era olw’ensonga eyo tuwandiikidde bannaffe aba NUP ne ANT mu butongole okubalaga we tutuuse era ne tubasaba tusisinkane tuteese ku ngeri gye tusobola okukolera awamu.” Besigye bwe yannyonnyodde.
Besigye yategeezezza bannamawulire mu Kampala nti batongoza abantu abagenda okubakungira abalala mu bitundu ebyenjawulo era akakasa nti ku luno bannansi bagenda kwenyigiramu basibire gavumenti ya Pulezidenti Museveni ekikookolo.
“Embeera si nnungi n’akamu. Twetaaga okukolera awamu okumalawo ebizibu eggwanga bye lirimu tusobole okulinunula. Ku luno tetugenda kwogera nnyo, twagala bikolwa bwe tuba baakununula nsi yaffe.” Besigye bwe yalambise.
Okusinziira ku Besigye, ttiimu eno eyalondeddwa erimu abantu okuva mu bitundu byonna eby’eggwanga era bagenda kutandikira ku kunnyonnyola bannansi ekizibu ekiri mu byenjigiriza, ebyobulamu, engeri embi gavumenti gye yakwatamu ekirwadde kye COVID-19 era n’awa we kituusizza bannayuganda awamu n’ensimbi za bannansi ezizze zibulankanyizibwa.
Besigye agamba nti bano baakulaga bannayuganda ekisaanye okukolebwa mu mbeera nga gavumenti ez’ebitundu tezirina wadde ennusu, abanene mu gavumenti abeefunyiridde okutulugunya abantu, okulinnyirira eddembe ly’obuntu, obutali butebenkevu, okwonoonera ssente z’omuwi w’omusolo ku UPDF e Congo awamu n’ensonga endala.
Ono yategeezezza bannamawulire nti tebakyasaana kumala budde nga boogera ku nsonga entono ng’ebbula ly’amafuta kuba eggwanga lirina ebizibu ebinene ebiritudde mu kifuba ebintu byonna ne bigootaana.
Omwaka oguwedde nga baakamala okutongoza PFT, aba NUP nga be basinga ababaka abangi mu lukiiko lw’eggwanga baategeeza nti tebalina bwetaavu bwonna kwegatta ku kisinde kino.
Wabula Ssaabawandiisi wa NUP, David Lewis Rubongoya, yakakasa nga Dr. Besigye bwe yabawandiikira mu butongole wabula n’akiggumiza nti tebajja kwegatta ku PFT kati ekirindiriddwa kwe kulaba oba aba NUP ku mulundi guno banneegatta ku kisinde kino.