Bya Samuel Stuart Jjingo
Ssango – Mawokota
Obwakabaka bwa Buganda wamu n’ekitongole ki Akvo International ne GRUNFOS bawaddeyo ebyuma ebiyambako okufukiririra nga bikozesa amaanyi g’enjuba okuyambako abalimi okuyita mubiseera by’ omusana.
omukolo gw’ okutongoza enteekateeka eno guyindidde ku kyalo Ssango mu Mawokota era Omukubiriza w’ olukiiko lwa Buganda, Owek. Patrick Luwaga Mugumbule yabaddewo kulwa Katikkiro Mayiga.
Katikkiro Mayiga mu bubaka bw’atisse Omukubiriza w’Olukiiko lwa Buganda, ategeezeza nti Obwakabaka bulina enteekateeka ez’enjawulo ezigendererwamu okusitula embeera z’abantu ba Buganda kyokka wabaawo ebisoomooza eby’enjawulo nga n’ekimu kw’ebyo ly’ebbula ly’amazzi mu kisaawe ky’ebyobulimi.
Owek.Mayiga alaze nti engeri esinga obulungi okuvvuunuka okusomezebwa kw’ekyeya kwe kwetegeka obulungi omuntu ng’alina obusobozi obufukirira, obutafiirwa birime bye.
Katikkiro yeebaziza aba Child Welfare and Adoption Society olw’obumalirivu bwe bataddemu okufuula ennimiro omutereddwa ekyuma, nga eky’okulabirako ekivaamu ssente
awamu n’okugifuula ennimiro eyigirizibwamu abantu e Mawokota, abasiimye n’olwokulabirira abaana nga bayita mu Nsambya Babies Home
Minisita wa Bulungibwansi, Obutondebwensi, Amazzi n’Ekikula ky’Abantu Owek. Hajjat Mariam Mayanja Nkalubo akoowodde bannamawokota okuwaayo obudde okuyigira ku nnimiro eno mwe bagenda okusomesebwa okutambula n’enkyuukakyuuka y’embeera y’obudde.
Ekyuuma kino kiwereddwayo aba Akvo International ne GRUNFOS era omukolo gw’etabiddwako n’Omubaka wa Denmark mu Uganda, HE. Signe Winding Albjerg