Bya Musasi Waffe
Kampala
Omumyuka wa Sipiika wa Palamenti y’eggwanga, Anita Among asabye gavumenti eweeyo amaka agazimbibwa e Kololo okubeera nga gakozesebwa Gavana wa bbanka enkulu eri abafamire y’abadde Gavana Emmanuel Tumusiime Mutebile.
Okusaba kuno Among yakukoledde mu maka gano agasangibwa e Kololo eggulo ku Lwokusatu bwe baabadde bamukugubagira.
Among agamba nti kino kisaanye okukolebwa ng’akabonero akasiima ebyo Mutebile by’akoleddwa eggwanga lino naddala mu kubbulula ebyenfuna byalyo.
“Nasabye Nnampala wa gavumenti, Thomas Tayebwa okukola kyonna amaka gano gaweebwe abafamire ya Mutebile,” Among bwe yategeezezza era n’addamu okukiggumiza ng’1ayita ku mutimbagano gwe ogwa Twitter.
Omumyuka wa Sipiika Among era yategeezezza abakungubazi ng’omugenzi Mutebile bw’abadde empagi luwaga mu bulamu bwe okuviira ddala ng’atendekebwa mu by’ensimbi mu bbanka ya Centenary.
“Bwenali omuwala omuto nga ngezesebwa mu mirimu mu bbanka ya Centenary mu ttabi lyayo erisangibwa mu kibuga Gulu. Prof. Mutebile yali alambula bbanka eno naye bwe yalaba engeri gyenali nkolamu emirimu gyange n’awa amagezi nkuzibwe era nekibeera, abadde kyakulabirako gyendi naddala mu byenfuna ebikwatagana ne bbanka.” Among bwe yategeezezza abakungubazi.
Ono era yayogedde ku mugenzi ng’omusajja omwesimbu, owamazima era ayagaliza abalala.
Among agattako nti Mutebile aweereza eggwanga lino n’omutima ggwe gwonna mu bifo byonna by’abaddemu ng’omukulembeze bw’atyo n’asaba abalala okumulabirako.
Palamenti etegese olutuula olw’enjawulo leero ku Lwokuna okusiima ebyo Mutebile by’akoledde eggwanga.
Mutebile yafiiridde mu ggwanga lya Kenya mu kibuga Nairobi ku Ssande oluvannyuma lw’okumala akaseera ng’embeera ye si nnungi.