Bya Gerald Mulindwa
Masaka – Buddu
Amyuka Cansala wa Muteesa I Royal University (Vice chancellor) Prof. Vincent Kakembo, atuuziddwa era nafuuka ‘Vice chancellor’ wa Ssettendekero ow’okutaano naweebwa ekisanja kya myaka 5.
Omukolo gw’okutuuza Amyuka Cansala Prof. Vincent Kakembo gukoleddwa Cansala wa Ssettendekero ono, Omulamuzi wa Kkooti y’Ensi yonna Julia Ssebutinde ku kitebe e Kirumba mu Buddu.
Bw’abadde ayogerera ku mukolo guno, Katikkiro Charles Peter Mayiga, agambye nti ebintu byonna ebikugira ssettendekero ono okukula kati biweddewo olw’enkyukakyuka ezirabwako n’essuubi Prof Vincent Kakembo lyaleese mu buweereza .
Owek. Mayiga agamba nti Prof. Kakembo mukulembeze gw’otasobola kubuusabuusa nti alina ebisaanyizo, ebiseera byonna alabiddwako nga yetegese okutambula olugendo Muteesa University lwerina okutambula, nga ali wamu n’obumanyi bwa bboodi, ekitiibwa kya Cansala, era kati alina essuubi nti ssettendekero ono atuuse ku ntikko.
Kamalabyonna Mayiga akunze abazadde okuleeta abayizi ku ssettendekero ono bafune ebiseera by’omu maaso ebitangaavu kubanga lirina buli kimu ekyetaagisa okufuula omuyizi yenna omukugu atuukiridde.