Bya Musasi Waffe
Soroti
Poliisi ekakasizza amawulire g’okukwatibwa kwa Pulezidenti wa Forum for Democratic Change (FDC), Patrick Oboi Amuriat, e Soroti gyeyabadde agenze okunoonyeza munnakibiina Moses Attan akalulu k’omubaka wa Soroti East mu Palamenti.
Amawulire g’okukwatibwa kwa Amuriat gasookedde ku mutimbagano wabula omwogezi wa poliisi mukitundu kya Elgon, Oscar Ageca avuddeyo nakakasa amawulire gano.
Ageca ategeezezza nti Amuriat Robert Centenary n’abalala babakutte kuyisa lugaayu mu mateeka g’ebyokulonda.
“Poliisi e Soroti ekutte Pulezidenti wa FDC, Patrick Oboi Amuriat, omubaka Robert Centenary ne mmeeya wa Soroti East Omerou Paul n’abalala 39. Bano awamu bawera 42 nga basangiddwa nga bakuba kampeyini mukiro nga obudde bwazo buweddeko ku wooteru ya Elysian mu waadi ya Akisim mu kibuga kye Soroti,”Ageca bw’annyonnyodde.
Ageca asabye abantu okukuuma amateeka agafuga okulonda mu ggwanga nagattako nti bakwongera okukwata abalala singa banayongera okumenya amateeka g’okulonda.
Kyokka ab’oludda oluvuganya bavuddeyo nebeekubira enduulu nga gavumenti bweyatandise dda okugaba ssente nga waliwo n’emmotoka ezitaliiko nnamba eziri mu kukola obuvuyo mu kalulu kano n’ekigendererwa eky’okukabbira munna NRM.