Bya Ssemakula John
Bulange – Mmengo
Minisita Omubeezi owa Gavumenti ez’Ebitundu, Okulambula kwa Kabaka, era Avunaanyizibwa ku baami ba Kabaka Ebweru, Owek. Joseph Kawuki, ategeezezza nga minisitule gyakulembera bwekwataganye n’Abaami ba Kabaka abawangaalira e Scandinavia okukwasizaako eggombolola za Beene ez’enjawulo zisobole okulaakulana.
Owek. Kawuki bino abyogeredde mu Bulange e Mmengo ku Lwokubiri bw’abadde asisinkanye abaamib’eggombolola ya Netherlands mu ssaza lya Kabaka eriri emitala w’amayanja erya Scandinava okulaba enteekateeka eno bwegenda okutambula.
Minisita Kawuki annyonnyodde nti enkola eno yakutandika omwaka guno, era baakutandikira ku ggombolola y’e Mutuba III, Kyambipisi, mu Kyaggwe, gye bagenda okuyamba okusembereza abantu baayo amasanyalaze basobole okugayingiza nga okusinziira ku nteekateeka kino kyakubaawo nga 20 Gatonnya, 2023.
Ono ategeezezza nti ensonga lwaki batandise namasanyalaze mukitundu kino kwekulaba nti banguyiza abantu emirimu basobole okulaakulana nga beeyambisa emiganyulo egiri mu masanyalaze.
Minista era abalambululidde ku nteekateeka endala ez’enjawulo eziri mu Bwakabaka mu kiseera kino, n’abasaba okuziwagira.
Eyakulembeddemu abaami bano, era akulira eggombolola ya Netherlands, Ssaalongo Samuel yeebazizza minisita Kawuki olw’okubaaniriza obulungi era neyeeyama kulwa banne okusobola bulijjo okuwagira enteekateeka za Buganda.
Ensisinkano eno yeetabiddwamu omuwandiisi w’eggombolola ya Netherlands, Lindah Ssekayita Muwonge, Ssekajugo Musoke, awamu ne Ssaalongo Edward Kibirige.