Bya Francis Ndugwa
Bulange – Mmengo
Minisitule y’Ebyenjigiriza mu Buganda wamu n’ekitongole ki Kabaka Education Fund (KDF) basunsudde abayizi abagenda okuganyulwa mu bbasale za Beene okusobola okubayambako bafuuke ab’omugaso mu ggwanga.
Okusunsulamu kuno kuyindidde mu Bulange e Mmengo ku Lwokusatu ng’ enteekateeka eno eganyudde abayizi abasoba mu 300.
Okusinziira ku Minisita w’Ebyenjigiriza Owek. Cotilda Nakate Kikomeko abayizi abamu bafunye sikaala enzijuvu abalala babasasulirako ekitundu nga mu bino byonna, Kabaka agenderedemu kutumbula byanjigiriza mu bantu be.
Owek. Cotilda Nakate yeeyanzizza Nnyinimu olw’okuteekawo ensawo eno era naawera okufulumya abayizi aboomuzinzi abanaaweesa Obwakabaka ekitiibwa.
Mungeri yeemu, yeebazizza amasomero gonna agasobozesezza enteekateeka eno era nannyonyola ku nkola gyebakikozeemu kuba ebadde ya bwerufu obusembayo.
Bbo abayizi abaganyuddwa mu nteekateeka eno baweze okukozesa omukisa guno obulungi basobole okukyusa obulamu bwabwe.
Kino kijjidde mu kiseera nga abaana batandise olusoma olusooka mu mwaka gwebyenjigiriza guno kyokka nga abazadde bangi bakaaba olw’ebisale ebifuuse kaweereege era abantu b’Omutanda enteekateeka eno bagyanirizza.
