Bya Ssemakula John
Bulange – Mmengo
Abantu ba Ssaabasajja Kabaka Ronald Muwenda Mutebi, boogedde amaanyi mu nteekateeka y’emisinde gya Kabaka egiddukibwa okujjukira amazaalibwa ge bwe baguze emijoozi kumpi kugimalawo.
Leero ku Lwokuna abayizi b’e Kyambogo bazze mu bungi okugula emijoozi gino nga bakulembeddwamu akulira abayizi ku Ssettendekero ono, Mbaziira Jude era ono yeeyamye okukunga bayizi banne okulwanyisa ekirwadde kino e Kyambogo.
Obweyamo buno Mbaziira abukoledde mu maaso ga Minisita avunaanyizibwa ku byobulamu mu Buganda, Owek. Dr. Prosperous Nankindu Kavuma era n’abakwasa emijoozi gya mitwalo 60.
Owek. Nankindu bano abasabye okumanya nti abavubuka ge maanyi ga Buganda kw’eyimiridde n’abasaba okukola kyonna okwerinda ekirwadde kino era bafube okudduka emisinde gino n’ekigendererwa ekirina kye kigatta ku bulamu bwabwe
Amyuka ssentebe wa NRM mu Buganda, Godfrey Kiwanda Ssuubi naye yeetabye mu nteekateeka eno era n’awera okwegatta ku Ssaabasajja Kabaka okulwanyisa Mukenenya naddala mu Buganda era okuwera kuno akukoledde wano ku BBS Terefayina ng’agula emijoozi.
Mu ngeri yeemu n’Omubaka wa Lubaga South, Aloysius Mukasa naye aguze emijoozi era n’asaba abakulembeze bonna abalala yonna gye bali okwettanira ebyobulamu nga bakwasizaako Omutanda era omukwano gwe balina gy’ali baguteeke mu bikolwa.
Era n’abazannya omuzannyo gw’ensero aba ‘Federation of Uganda Basketball’ nga bakulembeddwamu Pulezidenti w’ekibiina kino, Nasser Sserunjogi wamu n’eyaliko omubaka wa Mukono South, Johnson Muyanja Ssenyonga nabo baguze emijoozi okwongera okuwagira enteekateeka eno.
Aba Kam Property Consultants abagula n’okutunda ettaka nabo baguze emijoozi so nga n’ekitongole ky’Obwakabaka abatereka n’okuwola ensimbi ekya Ssuubi lyo Zambogo SAACO bagulidde bannakibiina kyabwe emijoozi nabo basobole okwetaba mu misinde gya amazaalibwa ga Beene.
Tutuuseeko e Makindye mu bavubuka era nabo ne bagula emijoozi gyabwe egiwerera ddala era ng’akuliddemu abavubuka bano, Musiri David, agamba nti omulembe Nnyinimu yaguwa bavubuka nga noolwekyo babadde balina okwetaba mu misinde gino butereevu okumalawo nnawookera wa Mukenenya.
E Bukomansimbi, omubaka omukyala owaayo Veronica Nanyondo alaze okutya olw’omuwendo gwa baana abawala abafunye embuto nga tebanneetuuka e Bukomansimbi era nga bino abyogeredde mu Town Council y’e Misanvu mu ggombolola y’e Kibinge bw’abadde atwalidde abantu be emijoozi mwe bagenda okuddukira emisinde gy’amazaalibwa ga Ssebuufubwango ku Ssande eno.
Amyuka Ppookino owookusatu, Muwalimu Kato Abdallah, agamba nti kyannaku okulaba nga Mukenenya yeegiriisiza mu kitundu kye era n’asaba abantu bonna okujjumbira okwekebeza.
Ate okuvaako e Ssingo, Omwami wa Kabaka amulamulirako essaza lye ery’e Ssingo, Mukwenda David Nantajja akwasizza Bishop Tomusange emijoozi gya mitwalo egisoba mu 22 okwetegekera emisinde gya Maasomoogi Ku Ssande eno.
Yo mu Busujju, Omubaka omukyala Joyce Bagala agulidde bakansala bonna emijoozi nga gino gimukwasiddwa omwami w’essaza lino, Kasujju Mark Jjingo Byekwaso Kaberenge.
Okugula n’okutonda emijoozi kukyagendera ddala mu maaso nga BBS Terefayina eri wamu ne bannamikago okuli Leediyo ya CBS, Airtel, UNAIDS, Majestic brands, DFCU bank n’abalala.